Tih Hlah! (Freedom from Fear)


fear

Nu ngak tlangval hna nih ka uar nawnmi hna le midang lam an len ti, bia an i ruah kan hmuh hna ah kan lung a fak. Nu le va zong kan i um cang ko nain kan i ham tuknak ah kan i si tawn. A thit dingah a ham cangmi a nupi cu a paw a zoh tikah nau a pawi kha a hmuh. Joseph cu tihnak in a khat. Khua zaza a ruat. Ka mak a hau ko a ti. Christmas laksawng sungbik pek a simi Joseph le Mary hi an lam len colh lo. Bawipa nih a kan thim ee, hawi hlei in kan tha ee tiah an i hloksai lo. An thin tu a phang. Khua an ruahnak ah an hrut deng. Pathian khinhmi rian hi kan tuan kho taktak lai maw tiah an lungre a thei. Joseph nih cun zam tak hrimhrim dingin ai tim. Because tihmi pathum a nei.

1)Minung hawi nih zeitindah an ka hmuh lai? Minung kan piahtana nganbik pakhat cu mah le sining te ah buai loin mi nih zieitin an kan hmuh lai tiah kan buaimi hi a si. Soi kan tih, thlak kan tih, huat kan tih. Thangthat kan duh, cawisan kan duh, dawt kan duh. Hi kan duhnak hna hi biatak cungah a hram bunh loin mi nih zeitindah an kan hmuh lai timi ah a hram kan bunh. A ngaingai tiahcun, a kan daw ngai rua tiah kan ruahmi kan hawi cheukhat han cu kan doh duhmi le ka tuan duhmi ai khah chung lawngah hawitha ah kan cang kho. Duhmi ai khah lo tikah an kan hlawt, an kan doh. Tih hlah, sual biacaihtu siloin sualnak in khamhtu Messiah a chuak cang! Kan sining cio tein a kan dawt, kan sining cio tein hman a kan duh.

2) Zeitindah mah thil hi ka tuah khawh lai? Kan kut ah kan neihmi kan zoh, bomh kan hal khawhnak kan zoh, kan duhmi thil le kan neihmi nih a phan lo. Kan khua ruahnak nih a phan lo. Cutikah hi thil hi cu ka tuah kho bal lai lo. Ka khang kho bal lai lo timi tihnak kan nei. Joseph misifak pa nih zeitindah vawlei khamhtu a zohkhenh khawh lai? David hrinsor a si caah hotel khan ting ve dingin min a va pek ve menmen khi a si. A kut ah zeihmanh a um lo. Tluninn an donh hna. Minung hawi nih kan lam an kan phih, kan hram an kan phelh tikah kan lung a dong.Tih hlah, phaisa nih a cawk khawh lomi nunnak petu le ai tumcop mi Mesiah a chuak cang! Minin an kutka an kan khar khanh lio te khi Pathian nih a kutka a van kan awnh hram thok lio te a si.

3) Zeitindah ka va dongh te lai? Thli chia hrang sual seh law teh? Tilet tho sual seh law teh? A dongh tiang a hodah a kan umpi lai? Mission rian thar kan sin a phak paoh ah a hram domhnak in a donghnak lei kong ah kan buai deuh. Biasi kan phai. Pakhat le pakhat kan i solhphelh. Joseph ca zongah khua a mui ve. Herod kong a ruah ah, tlangbawi pawl kong a ruah ah, kan nunak tiang a him lo ti kha minung sinak in a theih ve. Zaw sual ning, thi sual ning law, kan rian i din sual ning law….a tam tuk, a tam tuk…Tihnak nih kan nun a kan uk tikah kan pum a that khotu cancer hma bantuk a si. A kan tem a kan tawn, a kan rocar ter dih. Tih hlah, Emmanuel ti cu Pathian kan sinah a um tinak a si. Kanmah le kanmah i zoh loin a hramthok le a donghnak a simi Pathian zoh hna usih. Ruahchannak a neimi minung hna cu thiangthlarau laksawng a ting co taktakmi an si.

 

Categories: Theological paper

Leave a Reply