Pathian Kutchuak Na Si

Lenglei hmuhnak le a lang bia theihnak nak men in midang kha an man va khiak colh hlah. A hmai ah hmape a ummi paoh misual an si lo. A aw a hrang mi paoh mi chia an si lo. Mi dai mi paoh zong mi tha an si fawn lo. A der mi paoh sifak an si lo. A rummi paoh an i lawm dih lo. A vak mi paoh mifir an si lo. Minak paoh an sual lo i Mirang paoh an tha dih fawn lo. Pumrua tha paoh an thawng dih lo. A thau mi paoh pawkau an si hlei lo. A holh kho ngaimi zong an ral tha dih lo i a holh kho huahha lomi hna zong an thin phang peng hlei lo. Mizaw paoh an thi tlu lo i midam paoh an nung thai fawn lo.

Phungchim thiam paoh an hrinthan dih lo. Cawnnak sang a ngei mi paoh nih vancung fimnak an ngei dih hlei lo. Mitch Albom nih a chim: ‘‘Atu hmuh khawhmi, theih khawhmi le a cang liomi hna i an hnu leiah ai thup mi tuanbia a tak a um dih. Mi pakhat i a tuanbia hman tein hun theih piak tikah a cheu cu khuaruahhar an si i a dang tampi nih thinlung a kehkauiter. Na tuanbia cu an hringtu na nu sinin ai thok caah na nu nih a chimmi lawng kha na tuanbia taktak a si.” Mi nih cun an in cawi caan a um lai i an in thlak caan zong a um lai. Vawlei hi na caah muihnak lawng a si caan zong a um lai. Khi lio caan ah an hringtu na nu kha hodah ka si tiah rak hal ve te.

Jesuh hi aho set dah a si ti a hngalhtu hmasabik cu a nu Mary a si. A innpa nih cun ‘Lehtama Joseph fa’ an ti; Judah hruaitu hna nih ‘zu ram pa, sa ram pa’ an ti; zumlotu hna nih ‘Mi ralchia, a derthawmmi prophet’ an ti; A pa Joseph nih ‘Lakfa’ ti tiangin chikkhat cu a zoh beh. Nathanial nih Nazareth khua chungin zeithil ṭha hmanh a chuak bal lo, a ti. Hringtu a nu Mary lawnglawng nih ‘Thiangthlarau fa’ a si a ti. Nihin thawk in hmailei ah cun mi vialte nih thluachuaknu an ka ti lai; Bawipa, a ṭhawngmi Pathian nih ka cungah khuaruahhar tuk in rian a ṭuan. A min cu a thiang; Amah a ṭihmi vialte kha chan khat hnu chan khat in a zaangfah hna…” tiah a ti (Luke 1:46-55). A caan a phanh rih lo caah thuh a herhmi a thuh piak i ken a herhmi a ken piak. Canaan khua ṭhitumnak ah misur hang ser a fial. A tuah khawh ti a theih diam cang caah a si.

Midang ruangah na tha chia maw? Na nun ah teh na thil rit maw? Ahodah ka si ti kha nangmah tein i thei. Pathian kutchuak ka si ti kha philh hlah (Efesa 2:10). Cu na sinak cu ahohmanh nih an thleng kho lo. An in chuh kho fawn lo. An in ṭheuh, an in beuh hmanh ah Umsertu Jesuh kut ah i ap ṭhan. An ser khawh, an siam khawh. Hlawhhlangnu kha evangelist ah serkhotu a si. Hremtu Saul kha dawttu Paul ah ser khotu a si. Na chuah ka tein ka fa dawt, nai dawh tuk, duh na nung tiah rak ti zungzal mi fa dawt na si kha i philh hlah!

Categories: Sermon

Leave a Reply