Value in life

Principle of Life (Nunnak Tlaihtleng)

• By Chan Lian
• 7 March, 2013
• No Comments

Laimi kan nunnak ah i  sehchih ding cawnpiaknak kan nei maw? American minung hna i an siding ning, an dirhmun a si awk a simi hi an president a pathumnak a rak tuanmi Thomas Jefferson nih tam pi a rak cawn piak hna.

Jefferson hi an pu pa chan in mirum cia a si. US ram pi an van dirh in a voi thumnak president a tuan. Sal hi 800 a zuat ko bu ah, sal zong minung tling an si ve tiah a rak zumh. Minung cu mizei kan si paoh ah a luatmi si hi kan duh bik a ti. Uktu a si pinah a rum, nain lothlo thil thuam he a um. Ram dang bawi pawl  nih an rak tlawn zong ah cu thilthuam te cun a ton tawn hna. Pathian a zum, nain minung tuahnak tel lo cun zumhnak lawng cu san a tlai lo a ti. A tawinak in chim ahcun, US minung paoh cu a luatmi le amah a rian a tlawrh lomi an si lai, Pathian a zum lai i tuahsernak in a langhter lai, a sifak lai lo i mi cung cuang a si peng lai ti hi a cawnpiak mi hna a si.

Kan nih laimi hi Pathin theihnak, nu le pa upatnak, mahnak upa deuh nawl ngaih tbt cu an kan cawn piak lengmang ve. Pathian kan theihnak ahhin vawlei kong nakin vancung kong deuh hi an kan cawnpiak tiin ka thei. Laimi nu/pa cu zeibantuk minung phun khi dah a si lai ti hi an kan chim tuk loh. A tu zong ah kan nunnak cio ahhin i nun pimi zumhnak le, i sehchihmi hmuitinh kan nei huaha cio hna lo tiah ka ruah. Phaisa nei deuh  paoh kan uar hna. Vawlei caan tawite kan nun chung ahhin zeicahdah kan nun, zeidah kan i hmai thlak lai timi kan neih cio a hau. Cucu mah le mah i theih a si.

Keimah nih kai i dirpi khawhmi cu: 1) Pathian cu minung nak in thil ti kho deuhmi a si caah a nawl bia ka zulh lai, 2) Keimah hi Pathian thawng in mi lian ngan ka si kho, cucaah thiltha tuah ding paoh ka tlawrh lai lo, 3) Vawlei chawva nak in dawtnak a sunglawi deuh, chawva i khawn luaimai  nakin hawitha tampi neih a tha deuh 4) Kan nu le kan pa cu Pathian changtu an si cah upatnak ka pek peng hna lai, 5) Kan fa le ca thiamter dih ding, 6) Ka phaknak paoh ah miphun hawi khrihfabu ah kai funtom peng lai.