Unhealthy Sickness (Damlo zawtnak)

15380beggar

Dam duh i sizung ah a it cuahmahmi an tampi. Chawva tampi zong an hman. A dam rih komi zong nih hmailei damnak caah phaisa tampi dih in lente an i celh, an cawl an cang. Eidin zong an i sum. Sawmthum le kumriat a zeng cangmi pa a rak um. Dam kho ve seh tiah Besaida tibual kam ah an rak cawi i an chiah. A cung i vel neitu tampi an um caah  cu cancan a it sawh ko nain rawl lo le ti lo in a thi hraw lo. Bawi Jesuh a pawng a phak zongah ai theihter bak lo. Dam na duh maw, tiah a hal tik zong ah “duh” a ti lo. Mi nih dah ka duh na loin an ka peih  ti lo ahcun tibual zong ahhin kai peih hlei lai lo, ti khing khin a leh. Jesuh nih a damter thiamthiam. A tho i “kai lawm” ti zong ka khat hmanh chim bak loin a kal diam.

German ram thong pakhat ah mipa pakhat thong a tla. A zaw i thong sizung ah an chiah. A dam le cangka hawi sinah fonh i riantuanter ve ding a si. Cu tikah a hawipa sinah a nawlmi cu, ka ban pakhat hi ka khiak than, ti a si. Dam i dam man tuannak in dam lo i tuan lo ai thimmi kan rak um kho. Damiah nih an vuak i lam kamah a rak ril cuahmah mi zong kha mit i cawtter zau i ai hmuhter lomi phungbia saya pahnih zong an rak um khah. Mizeng pa cu Jesuh nih biakinn chungah a va hmuh than i, “A tu cu na dam cang, na sualnak kha ngol hna,  cu lo ahcun hi nak tha lo deuh nih an thlak sual lai,” a ti. Zen cu maw sual a si hnga? A hlan ah a rak tuahmi sualnak dang le Bible nih a tial fawn lo.

Damnak caan tha ngaih ko nain dam i zuam duh lo hi sual a si. Thil tha tuah ding a um ko nain i theihter lo hi sual a si. Hmuhlei lawng i ruahchan i peklei ah kut samh duh lo hi sual a si. Dam a duh lomi nihcun damter a kan duhpiaktu kha kan huat tawn hna. Judah upa pawl sinah Jesuh a rawitu cu a rak damtermi mizeng pa lila kha  a si. Thinlung taksa thlarau in damnak kan hmuh tikah a hlan bantukin nun menmen awk a tha ti lo. Tuanvo tampi kan nei. Theitha tampi thlai kan herh. Mi nih ei khawhmi si kan hau. Hi tikah, zapi nihcun dam lo tu hi thil fawizang deuh ah kan ruah i kan i thim theu tawn. Kan dam lo tikah midang mawhchiat in le damter a kan duhtu tiang leirawi in kan caan a liam kho. Caan tha kan neih lio ah dam le tuan i zuam hna usih.

Categories: Artical

Leave a Reply