Six Steps for Wholeness (Damnak Dotruk)

Minung nih kan duh lomi thil kan ton tikah kan thinlung hi a phunphun in a turcawl. Cucu kan dam thannak ding caah a herh vemi a si. Tahchuanhnak ah “Na nu accident in a thi” tiah an van kan chimh ka ahkhin:

Dot khatnak: Thawngchia kan theih, kan duh lomi kan ton tikah kan lau. A zeiti khuaruah awk kan thei lo. Ngaihchiat awk le tih awk kan thei lo. Shock kan ngah i kan lung a loh bantuk khi a si.

Dot hnihnak: Kan tonmi thil kha kan co hlang kho lo. Kan nu cu a thih awk hrimhrim a si rih lo kan ti. Va si hlah sehlaw ka va duh dah tiin kan thinlung hrumai hram ai thok. Mah ti khan rak um ning law, kha ti khan rak tuah hlah ning law tiah khua zaza kan ruat.

Dot thumnak: Zeihmanh ai thlen hlei lo tikah thinhun in kan i la. Ram le miphun hawi cung ah kan thin a hung. Kan pawngkam minung hawi cungah kan thin hung. Anmah ruang bak ah a si kan ti. A donghnak ahcun Pathian cung tiang in kan thin a hung. Keimah sinah hi thil hi a can awk a si lo kan ti.

Dot linak: Zeihmanh ai thlen hlei lo tikah lehrulcham duhnak thinlung ah a chuak. Kan tonmi thil ruangah a dang thil tha lo tam chinchin tuah duhnak thin lung khi a si. Pa sal ka si lo maw, nu sal ka si ve lo maw, tiin kan min kan i chal i a lam kan hmuh khawh tawk in lehrul cham kan i tim.

Dot nganak: Kan duhmi paoh cu kan tuah cuahmah ko nain hngangamnak a um kho lo. Kan thinlung a zaw chin lengmang. Chungkhar sin hmanh ah holh thlum bia nem kan chim kho ti lo. Kanmah le kanmah kan i hua than. Pathian nih a ka kal tak ko cang tiah kan ruat. Mah le mah sual i phawtnak in kan khat. Thih hmanh hi a tha deuh ko lo hme maw kan ti.

Do ruknak: Duh tlinlonak vawlei ah a ummi kan si tiah kan van ruah khawh. Minung cu serchommi kan si caah a palh khomi, a baa kho, a zaw khomi kan si ti kan van ruah khawh. Kan tonmi thil hi mi dang nih an rak ton cia ciomi lawng te a si tiah kan van zumh. Sertu Pathian sinah ah kai ap ahcun ka lam a tluang than ko lai tin thlacam hram kan van i thok…..damnak a si.

Categories: Ministry

Leave a Reply