The S/W of The Peaceful People (Mi Daidam Pawl An Thawndernak)

 

peace“A Daidammi Minung” pawl cu daihnak le rualremnak a duh i biapibik ah a chiami an si. Vawlei hi dai sehlaw i sikthiat, i elhngiarnak um hlah seh ti a duhmi an si. Midang kha hna va hnawh a duh lomi an si. Zei paoh hi anmah le an caan, an sining cio in cang hna seh, kal cio hna seh tiah a hna ngam khomi an si. Minung hawi kha anmah le an sining cio in theihthiam khawh an i zuam. Mi le mi karah remnak ser a thiammi an si. Ruahnak dang a neimi hna kha an tih hna lo. Caan hman rian le rian tenek  ah tha nuam tein an tuan. Upatnak kha heih tiah an kawl lo nain upat a tong ngaimi an si. Ngaihchiami hna nih an mui an hmuh hna bakin damnak an hmuh khawh.

“A Daidammi Minung” pawl nih “Keimah cu ok ka si, zeihmanh ka poi lo” timi lungput fak tuk in an thlaih tikah tih a nung. An nun nih a celh lo tiangin midang le lenglei thil kha cohlan an timh. An duhnak, an thinlung, anmah ruahnak kha kal tak an timh. Anmah an thinlung a chungin a rak dam ve ti lo tikah seihkuzin rumro an hmang. Silole ih thlawrh in ih an duh. Lungtlinlonak le i dannak kong chim le hmuh an tih. Biakhiah an i harh i anmah ruahning hmanh an i chim kho lo. Cutikah a cheu cu thathut in an i la, a cheu cu heh tiah an i felter. Anmah le anmah an i zumh ti lo caah midang nih an kan fak lai maw timi an kawl. A donghnak ahcun “Zei hmanh poi lo, nun can tawi teah, a si paoh in siseh” tiin an lungput a tum zuahmah.

“A Daidammi Minung” pawl thazang an chuah deuh a herhmi cu “Mah le mah i dawt hramthok” a si. Ruahnak ai dan ko zongah remnak a um kho ko, ti zumh a hau. I sinak te hna zong nih thil tha a chuahpi khawh ve ti zumh ding a si. Cun keimah cu mi nih an ka dawt i, ka zawn a ka ruattu an tampi ve ti philh lo ding a si. Keimah ka dam hmasa ahcun midang caah thil tha tampi a tuahkhotu ka si ti i hngalh a hau. Midang kong ruah tuk ruangah mah le mah ai zangfak kho ti lomi zawtnak ka nei, ti i theih a hau. Lungretheih caan ah thut sawh bak lo ding. Cawlcanghnak pakhat khat tuah peng ding. Mah le ruahning, mah le thinlung kha biapi deuh in chiah hmasa caan a si cang.

(Wagner Enneagram Personality Syle Scales: Jerome P. Wagner, Ph D)

Categories: Artical

Leave a Reply