Thlacamnak

Satan nih zumtu kan nun ah tuah ai zuam bikmi pakhat cu thla cam hna hlah seh tihi a si. Satan nih a tih lo cemmi cu thlacamnak ai tel lomi cacawnnak, thlacamnak ai tel lomi rian thatha tuan, thlacamnak ai tel lomi biaknak hna an si. Minung pumpak kan i zuam lennak, kan fimthiamnak kan i bochanmi hna pawl hi cu Satan a nih a chuak. Thla kan cam belte ahcun Satan a thirh (Samuel Chadwick). Thla a cammi khrihfabu nih Pathian thawngtha an karhter khawhbik (Andrew Murray). Nihin khrihfabu nih kan herh bikmi cu seh thilri an si lo, theory le method zong a si lo. Thiangthrau nih a hman khawhmi zumtu an si. Thiang Thlarau cu thla a cammi hna sin lawng in ai phuang (E.M. Bounds). US ram ahhin kan tihmi thil tampi a um. Hruhnak thil le ngaihchiatnak thil tampi kan ton. Hi thil vialte in kan luat khawh ding ah thla a cammi kan si a herh (Steve Shepherd).

Thla cam hna usih. Kan tuahmi thil vialte hi thlacamnak in thok hna usih. Inn ah cam hna usih. Biakinn ah cam hna usih. Mawtaw cungah cam hna usih. Thil suk pahah cam hna usih. Inn pawng thenh pah ah cam hna usih. Ei lai, din lai ah cam hna usih. Ih lai le thawhka ah cam hna usih. Rian tuan le, cacawn lai, ca tial lai ah cam hna usih. Hawi he i ton lai, lente celh lai ah cam hna usih. Kan caah san a tlaimi minung hna ca he a tlai lomi ca he cam hna usih. Kan nupi le kan ve le caah cam hna usih. Kan fale caah cam chinchin hna usih. Kan chungkhat caah cam hna usih. Hruaitu hna le ram le miphun caah cam hna usih. Lungthin thiang tein thla cammi cu hmual a nei (James 5:16). Herhbaunak kan nei maw? Pathian sinah hal hna usih. Damlonak kan nei maw? Pathian sinah thlacam usih. Saduhthah kan nei maw? Pathian sinah biathli chim usih. Zungzal nunnak hmuh kan duh maw? Amah Pathian lila sinah kan nun ap usih.

Phungchim thiam timi hna zong thlacam locun an bia a nung lo. America phungchim minthang D. L. Moody hi thawngtha chimmi va ngaih ah England a kal (1872). Mi minthang a si caah ruah loin phungchim an thiah. Zarhpi zing ah thawngtha cu a chim. A bia a kal in a kal kho lo. Mi hrut ka si, thawngtha ngaih ah ka ra i thawngtha ka chim cu keimah palh a si, a ti. Mah lio i ai pummi nu pakhat cu inn ah a lawi i a u nu mi dam lo kha Moody thawngtha chim kong cu a chimh. A unu nih cun Moody thawngtha a chim lai ti ka rak theih tung lo, thla ka rak campiak hnga lo maw, a ti. Cun a ihnak khan ah a kal i tu zanlei cu rawl ka pe hlah, Moody caah thla ka cam lai a ti. A zan Moody thawngtha chimnak ah minung 500 leng nih Jesuh Khrih an cohlan. Cucaah a hmasa bik ah fial kan duhmi cu, nawlnak le thlacamnak le halnak le lawmhnak biachimnak kha mi vialte caah, kan Pathian sinah tuah u sih. Siangpahrang hna le nawlngeitu hna caah daite le remte le Pathian ṭihzah le ziaza ṭha in kan nun khawh nakhnga, thlacam u sih (1 Timoty 2:1-2). Thla kan i campiaknak thawng in Thiang Thlarau riantuan hram ai thok.

Categories: Sermon

Leave a Reply