Value in life

Prayer of Good Members (Member tha nih an thla cammi)

• By Chan Lian
• 11 January, 2013
• No Comments

Maw Bawipa,

 Nangmah cu kan khrihfabu nih kan in lawmh i kan in thangthah! Lianhngannak, thawnnak, le teinak hna cu nangmah ta an si ko. Zeizong vialte cungah cungnungbik na si. Rumnak le upatnak zong nangmah sinin a rami an si. Na kut chungah mi vialte nganter khawhnak le hmetter khawhnak a um. Vancung le vawlei cungah a ummi thil vialte hi nangmah ta an si.

Kan khrihfabu nih kan in lawmh khawhnak le kan in thangthat khawhnak hnga caah kanmah cu zeidah kan si? Pastor le hruaitu zong zeidah kan si? Zumtu chungkhar cio zong zeidah kan si? Kan nih laimi cu mi vakvai le umnak nei lo kan si. Hi ka hmun ah khual kan si. Kan fimthiamnak hna, kan dinfelnak hna kan i zoh tikah thladem bantuk men kan si i ruahchannak zeihmanh a um lo.

 Kan nunnak le kan damnak, kan i lomhnak le kan i ruachannak hna cu nangmah cung lawnglawng ah a um. Na biakinn ah kan chuahpimi kan chawva le thilri hna hi nangmah kut chuak an si dih. Nangmah ta lila an si. Na duhmi kha na nganter hna i upatnak na pek ko hna. Maw kan Pathian, nangmah nih mi thinlung na hneksak i dinnak kha a duhmi na si ti kha kan hngalh cang.

Kan Khrihfabu chungkhar hna nih nangmah caah sian lomi kan nei lo. Lungthin thiannak le dinfelnak  he kan in biak lai i kan in lawmh zungzal lai. Nangmah na rian a tuantu pastorte zong kan upat hna lai. Kanmah le kanmah zong kan i daw lai. Khualtlung mileng le innpa he i dawt kan i zuam lai. Hi thil vialte tuahkhawhnak cu kan pu kan pa hna sinah na rak chiah bantuktuk khan kan nih sin zongah chia zungzal ve ko.

Lung tengnge lo tein an biatu kan siter. Bawipa kan Pathian  nangmah na min cu thangthat si zungzal ko seh! Amen.

Chirchchan: 1Chanrelnak 29.