Covid-19, Minung le Pathian

1. Siangpahrang Uzziah cu thinghmuihma in kum kul a zawt hnu BC 740 ah a thi (Isaiah 6:1a). FB, Twitter le tu lio social media khi hei um ve hna sehlaw zeitlukin dek thawng a va than hnga. Tu lio Covid-19 ruangah chungkhar, khrihfabu, company, phaisa khommi 401k tbt ah a buai lo kan um lo. Thin a phnag, lungre a thei. Sianginn khar, rian dinh, leng chuah lo, phaisa sungh le ngeih ti lo nih a kan den. Tlawmte tak a sat ah lungre theih. Khuh deuh paoh ah khua zaza ruah a si. Kanmah lawng kan si lo. Bawmh hal in kan chawnhmi agents vialte, lam i kan hmuh kan tonmi vialte zong an si ve. Dawr thil zuartu vialte an si ve. Zei can a rauh rih lai le thei lo. Um… Hi lio te hi kan sining, kan lungput le kan zumhnak a langh bik caan a si hlah maw ti ka ruat.

2.Zeidah kan can timi hi kan Pathian nih a hmu hnga lo maw, tiin biahalnak kan ngei cio lai. Hi lioah hngal hmasa hna seh ti an kan duhmi cu cunglei innchungkhar hna sinah zeidah a cang lio ti a si (Isaiah 6:1b-4). Pathian riantuantu Mike Stone nih cunglei bawi thutden ah a thumi kan Pathian biazai a phuahmi hun rel ve:

A tei khawh lomi raldohnak ka hmu bal lo (Never seen a battle He couldn’t win)
A iap khawh lomi pumpak ral ka hngal bal lo (Never known a foe He couldn’t defeat)
A phenhei khawh lomi thilrit ka hmu bal lo (Never saw a burden He couldn’t lift)
A leh khawh lomi biahalnak a thei bal lo (Never heard a question He couldn’t answer)
A ngaihthiam khawh lomi misual ka tong bal lo (Never met a sinner He couldn’t forgive)

Amah cu:
Caan a um hlan ah a um cang
Nika le thlapa an tlan hlan ah a um cang
Vate an zual hlan le nga hna ti an i lio hlan ah a um cang
Cawmpei an awnh hlan le caw hna hnar hlan ah a um cang

Amah cu:
Israelmi han nih rili sen an tan lio ah a um
Jordan tiva an tan lioah a um
David nih Goliaath a thah lioah a um
Jezebel nih Elijah a dawi lioah a um
Chiandeih kua chung i Daniel an thlak lioah a um

Bartimaeus nih khua hmuh a duh lioah a um
Lazarus nih nun than a herh lioah a um
Zakia nih khamhnak hmuh a duh lioah a um
Peter nih nun thar ngeih a herh caan ah a um
Keimah pumpak ngaihthiam ka herh caan zong a um
A tu zong a bawi thutden ah a um

Satan nih a bawi thutden in a thial kho lo
Nebuchadnezzar nih a thial kho lo
Herod nih a thial kho lo
Pilate nih a thial kho lo
Minung thawnnak, Pathian a um lo, Pathian tampi a um timi pawl nih an thial kho lo
Communism, Marxism, or socialism nih a thial kho lo
Nero le Hitler zong nih an thial kho lo
Stalin, Lenin le a ra lai ding mi ralbawi hna zong nih an thial kho lo
Thihnak, thlan le Hell nih a tlai kho lo

Pathian cu:
A thinphang lo
A tha a thirh lo
A lung a tuaitam lo
A lau bal lo
A 401k a zoh bal lo
President, Govenrnor, Mayor le hnubik thawngpang tibantuk a zoh lo, a ngai lo

3.An chim tawnmi cu, na pawngkam lawng na zoh ahcun na lungre thei lai. Nangmah lawng naa zoh ahcun a thei chinchin lai. Vanlei na zoh ahcun na tha dam lai, ti a si. Van ahkhin dingthlu lairel kan Pathian cu kanmah khamh awh ah a thu ko. Cu Pathian cu panh lo in Kan nunak kan thlarau a khamh kho tak lomi pathian dang kan ngei sual maw? (Isaiah 6:5-7).

“E law, mah hi ka si ko cang! Ka lo ko cang,” tiah Isaiah nih a ti bang kanmah serchommi pathian nih hnahnawh a kan pek cio. Kan pathian aa dang cio lai. Kan inn kan lo, kan chawva, kan fale, kan dirhmun, kan nungak tlangval tiin. Na pathian a thancho le thangthat a co paoh ah na lawm lai. Soisel le tumchuk a ton tikah na thin a hung lai. Na pathian lohtlau aa timh paoh ah na lungre a thei lai. Harnak caan lio ah lungretheih an pe biktu kha na ser chommi pathian a si. Kanmah serchommi pathian nih cun zei paoh ah mi tlamtling si le duhmi tlin zungzal kha a kan tinh piak. Cunglei Pathian taktak nihcun mi tling lo ka si ti i hngalh i Amah fuh panh kha a kan duh piak. Isaiah nih a sualnak aa hngalh i a phuan tikah meitil in a sual cu thianh piak a si. Pathian rian ah thlah a si. Harnak caan nihhin teinak tlangpar i kan um lio caan i kan cawn khawh lomi nunnak lam a kan cawn piak. Tutan kan harnak nih zeidah keimah kong a ka chimh timi hngalh hi a bia pi tuk.

4.“Keimah ka kal lai! Ka thlah tuah,” timi hi Pathian dawtnak a fiang mi hna au thawng a si (Isaiah 6:8). Pathian nih thlen an duh, Amah caah nangmah hmang in riantuan a duh. Har lio caan ah zeidah kan tuah khawh? Na innpa zoh hna. Na unau veng hna. Na khrihfa hawi bawm hna. Mi thinlung damter. Thawnter. Pathian sinah caan tam chinchin in hmang. Har lio caan hi kan sining kan i hngalhnak, vailam tung hram kan phaknak le nun thar kan ngeihnak si ko seh!

Categories: Sermon

Leave a Reply