Luatnak le Tuannak (Independence Day)

Luatnak, zalonnak cu kan rak duh tukmi ciomi a si. Ka hmuh taktak tikah a lawmh awk zong kan thei ti lo. A man fah zia zong kan ruat ti lo. A hman zia zong kan thiam phah lo. Minak pawl zong kha sau tuk sal an rak si caah luatnak an pek hna tikah luat zia an thiam ve lo. Nihin tiang zong a si ko rih. Kannih kawlmi zong hruhrang uknak tangah sau ngai kan um caah luatnak cohlan zia kan thiam ve lo kho men. Luatnak hi a lakin hmuhmi a si bal lo. America minung nih kan i nuamhpimi luatnak hi pupa hna nih an nun in an cawkmi a si (Dr. J. Gerald Harris). Ram dawttu pasal nusal hna cu ‘patriot’ tiah an auh hna. America pupa minung 56 hna nih luatnak thanhnak (Declaration of Independence) cu July 4, 1776 nih min an rak thut. Henry VIII England siangpahrang uknak tha lo in America ah a rak zammi an si. Hika an phak hnu zong ah ram kip nih an rak dawi hna i ral an i tu peng. An ral tam deuh an tei hna hnuah State 13 thum fonh in America cu a luatmi ram tiah an thanh hi a si. Thisen tampi a luang. A hmasabik president Goerge Washington nih Endland kut in kan luat cu Pathian tangah luat tein ka i dor khawhnak a si, a rak ti.Hi luatnak min an thut i an thanh hnu ah ral doh ding a um rih. Tuan ding tam tuk a um.

Mi luat ka si ti lawng a za lo. Kan luat tiah min thut lawng a za lo. Luatman pek a hau. Tuan a hau. A luat rih lomi bawmh ve an hau. Amreican luatnak thanhnak ah min a thutu minung 56 ahhin minung 27 cu Bible sianginn a dihmi an rak si. Min an thu dih hnu 1782 ah Reverend John Witherspoon hruainak in Bible ca an nam. Charles Thompson cu Bible leh ding in rian an khinh i Thompson Bible cu America ah a voi khatnak lehmi a si. Benjamin Rush nih min an thutnak khua ah Philadelphia Bible Society khi a dirh. Minthutu vialte thazang chuahnak thawng in kum riat chungah Bible Society 121 dirh a si. Francis Hawkins cu a hmasabik Amrerica khrihfa hlabu chuah ding ah rian an rak khinh. Zumhnak, luatnak le tuahnak in America ram cu an rak dirh. A voihnihnak president John Adams kha a tuan hawi Benjamin Rush nih, kan ti kho tak ngai hnga maw tiah bia a hal. A lehmi cu, “Kan sual kan i chir i Pathian kan i bochan ah cun Yes,” ti a si. A voi thumnak an president Thomas Jefferson nih Psalm 33:12 hi aa tleihmi Bible a si tiah historian (Tuanbia theitu) pawl nih an chim (Nelson Price Tialmi chungin). Chim cawk lo a um rih. America pupa hna nih an zumhnak khat luatnak tiang phaknak ah an hman. Cu luatnak cu tuannak in an langhter.

Kan nih Laimi khrihfa hna zong zarh tin ti awk in “Miluat kan si” tiah hla kan sa. Galati 5:1 zongah Mithang Paul nih, “A luatmi kan si cang. Khrih nih a kan luatter cang. Cucaah fek tein dir u law sal ah khan i ser ṭhan ti hlah u,” tiah tlang a au. Khrih nih man fak tukin luatnak a kan cawkpiakmi kha tuannak leiah hmang loin cuarpar tan le tan lo kong buainak tuah an hman caah a si. Khrih nih, “Bawipa, Bawipa,’ tiah a ka timi paoh in Vancung Pennak chungah an lut dih lai, tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai (Mtt. 7:21),” a timi hi i theihter lo awk a tha lo. America pupa hna nihcun zumhnak kong i el lengmang kha um hlah seh an ti. Mah duhmi bu ah Pathian biak cio. Bible sianginn zong bu kip nih tuah cio. Mah le fianning tein Pathian biak i tuan zungzal kha biapi ah an rak ruah. Tuannak aa tel lo ahcun luatnak cu pakpalawng a si. Zumtu ciocio pianthar le thar lo i el nak in riantuan i sawm a tha deuh. Ka luat ai pet ti i lutaw hngal loin biakinn chung ah aukhuan le i lehthal nak in biakinn hnawm thenh san a tlai deuh. Zeitluk in kan soi hna zong ah Pathian ca i a si khawh tawk a tuan lengmangmi cu an theipar kan zunzungzal ko hna. Luatnak cu tuannak caah caan tha bik a si.

Categories: Sermon

Leave a Reply