Value in life

Depression (Lungthin Zawtnak)

• By Chan Lian
• 11 January, 2013
• 2 Comments

Depression timi biafang hi laiholh in leh ahcun lungzawtnak ti khawh a si. Nain zawtnak rungrul ruangah a chuakmi a si lo. Ci le kor in a kalmi zong a si lo. Rum le sifah ruang zong ah a si lo. Mui le sam he zong ai tlai fawn lo. Mi rum zong depression an nei, sifak zong kannei. Damnak ah si din a hau lo nain dam a har ngaimi zawtnak pa khat a si. A dam zau lo a si ahcun thihnak lam tiang a phan kho.

Depression timi lungthin damlonak cu a fakmi, a lin mi i dawmh len a haumi zawtnak a si lo. Chung lei mi a zuk i kan pum hi a rocarter khotu a si. Cu zawtnak cu khuaruahnak in a chuakmi a si. Keimah hi mi nih an ka daw ti lo, ka bia zong a man ti lo, san ka tlaihnak zong a um ti lo, ka tuah ciami thil ruangah thih ka phu tibantuk ruahnak neih in ai thok. Curuahnak hna sau nawn te neih hnu ah nun man hi zeidah san a tlaih tiin khuaruahnak a van i chap. Mirang nih “hopelessness” an ti i zeihmanh ruahchannak a um lomi nunnak khi a si. Ruahchannak a um lo ahcun nunnak hi ai peh kho lo.

Mi tampi cu hi zawtnak hin an thi. Mah lemah i thahank, mi va thahnak, chungkhar le dawtmi thahnak te hna vawlei ah a karh. Kanmah laimi tam nawn zong nih  ram thumnak ram  kan phak hnu ah an ton cang. Thinlung taksa  kan batnak le kan harnak in chuahnak lam kan thei lo. Cu cu depression zawtnak kan timi cu a si. Dam khawh a si maw?

Dam a fawi temi zawtnak a si. A lam theih lo ahcun dam khawh a si fawn lo. Zei dah a lam cu a si? A tampi mi chungin a biapibik cu “Pathian nih minung kan ruah khawh leng in thil lianngan ka cungah a tuah khawh” ti zumh i, i ruahchan ngam a si.  Cun kan lungre thihnak kha a hmurka ai sum mi le cawnnak a neimi pastor sin ah chuahpi ding a si. Pathian a biami hna nih lungzawtnak cu kan tei khawh zungzal. Pathian duhnak kha na duhnak ngan bik ah chia law, na lung thlitum cu a tlinter lai.