Buainak Chungin Mit Aunak

Harnak le Thluachuah

A nung i a cawl kho rih mi na si ahcun lenglei ral he nai then kho lo i ruah lo thluachuah he zong nai hlat fawn lo. Thaizing ah zei a chuak kho tihi hohmanh nih theih khawh a si lo. Hlanchan Rome ralkap thawngbik nih khua hme te an kulh i kan lak cang lai tiin an i timh lioah thilchia hna a hrang, ruahpi hna a sur. Tikah, hau leng ummi Rome ralkap hna tu an thi i thirthir phangphang i khuasa mi khua chung minung hna tu an him. Pathian lawng nih a canter khawhmi thil tangah ai hlawk pimi an um bantukin ai sungh pimi rak um a hau ve. Covid zawtnak nih vawlei pi a den i minung 699,734,110 an zaw. Minung 669,459,432 an dam than. Minung 6,957,597 an thi.  Rel cawk lo company an rawk. A let tam deuh company thar an chuak fawn. Cozah bawmhnak le pension a ei liomi tar tampi an thhih caah ram tha cozah hna nih phaisa tampi an i khonnak ah a cang. Chungkhar terual nawnmi caah phaisa ngeih hram thok nak zong a si. Chim duhmi cu Pathian lawng nih a ruang a theih i a canter mi boruak tampi ahhin sining le dirhmun ai dang lengluangmi minung nih i hlawkpi caan, izatlakpi caan tiin a um zungzal. Nun hi Bawipa kut i chanh lo ahcun a him lo. A thluachuah he ai hlat. Bawipa aa bochanmi cu Zion Tlang bantuk an si; Zion Tlang, hninh khawh zong a si lo i ṭhial khawh zong a si lomi bantuk an si (Psalm 125).

Ka thawng na ti men lai, nangmah nak thawng an um ti kha philh hlah. Ka fim na ti, nangmah nak mifim an um ti kha philh hlah. Kan ngei na ti, nangmah nak ngei an um ti kha philh hlah. Bawmtu an si khawh bantukin ral zong an si kho. Mahnak in a fim, a thawng, a rum mi hna hi sehtan nih na ral ah a ser khawh hna bantukin Pathian nih an bawmtu le an chanhchuahtu ah a ser khawh ve hna. Mah nakin a hrut, a sifak, a derthawm mi hna zong sehtan nih an thangchiattu, an mualphohtu, hnulei doktu ah a hman khawh hna bantukin Pathian nih an hmannak, upatnak na hmuhnak, le na thluachuah ah a canter khawh thiamthiam ve. Mah nak fim, rum, thawng mi hna va tih le mah nak hrut, sifak, derthawm mi hna va zeirel lo lungput ngeih cu khamh khawh ti lomi cancer zawtnak he an tahchunh tawn. I uah hlah, i phawrhlaw hlah, na ruam kai hlah. Mi nih zeihmanh an i rel hlei lai lo. Tordor tein nung, siang tein nung, thlachiat ruahnak ngei. Khua ti caan tiang in na lei ah an tang lai, a nungmi Pathian nih. A haubik tu ralbawi Hamman nih Mordekai khuachung zalam tlang ah sunglawi tak in a chawh pi i “Siangpahrang nih upatnak pek a duhmipa cu hi bantukin tuah a si lai,” tiah a au (Esther 6:11).

Buainbainak le soiselnak hna hi an dihlak in na caah a tha lo mi an si lo. Theih na duh lomi bia, ton a na duh lomi thil hna na theih na ton hrimhrim ko hna lai. Na thin a han lo, na lungre a theih lo ahcun mi lungthin tlamtling lo na si caah a si lai. Kaa in na chim lo zongah na lungchung tein khua fakpi an ruahter a si ahcun na hmai lam a tluantertu ding, na nun an remhtu ding an si. Thil lianngan deuh an tuahter khotu ding a si. Sehtan nih Khrihfa hna cu hremnak hmang in an ci hmih a timh hna nain a tei hna hna lo. Lenglei cun teikhawh an si lo ti a theih tikah chunglei in ihuatnak, izumhlonak le idohnak thlaici a tuh than. Ahmasabik Lamkaltu hna i an Khrihfabu cu chunglei buainak in a khat. Phunkhat le phunkhat an i rem ti lo. Hruaitu le mipi an i do. Hmailei kal cu chim lo rawh dih le kuai dih an i tim. Lamkaltu hna nih an rian taktak a simi an tuan kho ti lo. Mipi hna i an herhmi zong a tlam tling fawn lo (Lam. 6). Hibantuk lio caan ahhin Thiangthlarau phuan hram ai thok. Riantuan bawmtu ah bu chung upa an thim hna. Khrihfabu ah uktu an thim bal hna lo. Rian hlei khinh tu khi a si caah Khrihfabu hruaitu paohpaoh cu sal hruaitu (servant leaders) tiah khawh an si. Cuticun nihin ni tiang a nungmi ah a cang thai. Buaibaibak hna hi Pathian lei i kan i mernak caah a rak herh ve mi a si.

Categories: Sermon

Leave a Reply