An Angry Christian (A Thin A Hungmi Khrihfa)

Bible: Matthews 5:21-2

            Kan hnu kan khrihfabu khual kan neih lio ah kan nu kha mipi lakah tlawmte ka mawhchiat. Tlawmpal ah mawtaw ah kan kai hna i lente celhnak leiah kan kal. Ka fale pathum le kan church chairman pa a fapa le kan nu tiin kan kal tihna. Cu lio ah kan nu nih “Hawi hlei mifim ah maw nai ruah, mihmai misik hman hi thawn ah maw na rel!” tiah voi hnih le voi thum a van nolh lengmang.007Ka thin a ka sawh tuk cang i ka ha cang kai rial, mawtaw steering fak piin ka tlaih. Cu lioah ka fale kha hna an van chet. “Dai uh” tiah voi khat ka ti hna. Hna an van chet than i ka aw thareng dihlak in “Dai uh” ka ti than hna. Kan nu nih “Na sual tuk” a van ka ti ve hoi chap i “Kan thah dih hna lai” tiah ka au than. Ka lungchung ah mawtaw hi lovurmar in mawng lawlaw ning ti hna a chuak. A thin a hang taktakmi pastor ka si lio a si.

Thinhan khawhnak hi Pathian nih kan pum chungah serchih cia a si. Pawngkam ah midang nih ka duh lo ningin bia an chim, thil an tuah tikah siseh kanmah tein khua kan i ruah sual zongah siseh kan thin a hang kho.  Thil kan ruah loning in a can tikah le ka caah ral a si tiin kan hmuh tikah, mah le mah i runvenduh ah maw, mi va dohdal duh ah maw a hung chuakmi taksa, thinlung, thlarau turcawlnak khi thinhunnak kan timi cu a si. (Andrew Lester, 2003). Thluak in ai thok i, thinlung nih a zulh, cun pum nih a phi a chuah. Kan thin a han lioah kan hmai thahri 153 an tur, thi kal a sang chin, lungtur a rang chin, kut tum, hacang rial, lufah, chungtlik tiang in kan pum nih a tuar.

Thinhannak nih thil tha lo tampi a chuahter tawn ruangah Matthews 5:21-22 i Jesuh bia zong hi ning cang lo deuh in an leh i Middle Age (Ad 500-1500) kar ahcun “thinhannak” cu thihnak tiang a kan phaktertu sualnak pasarih lakah pakhat ah an chiah. Mithah lainawn tluk ah an ruah. Khrihfa asimi cu thinhan lo ding ti tluk in kan ruah tawn caah kan thinhannak hi ka thuh theu. A taktak ahcun minung vialte hi nifatin ti awk in kan thin a hang cio: 1) Mah le mah cungah thianhan a um. Duhmi tuah khawh lo caan, sungh zatlak caan, thil tuah i palh caan, zawtfah caan; 2)Midang cungah thinhan a um. An tuahmi le an chimmi hna nih ka zo an ka langh tiin kan ruah caan, an kan lonh lai ti kan phan caan, kan bia zei ah an rel lo caan, daiziar in kan sikmi hna nih an i umter caan; 3) Pathian cungah thinhan a um. Ziah muichia tuk in a ka ser? Thlacam a ka leh lo? Ka dawtbik a ka lak piak? Tefa a kan pek lo?

Kan thin han le cangka khua ruat ta loin kan leh colh ahcun mahpumpak ah taksa le thinlung zawtnak a chuahter khawh. Minung hawi he kan ipehtlaihnak a hmal dih cikcek khawh. Huatnak, lehrulcham duhnak, fahnak pekduhnak, hawikom le Pathian he i hlat thainak hna a chuahpi khawh. Bia hram thok i keimah kan thinhannak nih a tu tiang kan ning a ka zahter ve. Sual kai phaw peng. Kan nu zong a lung a fak, ka fale zong an lau lengmang. Cun kan thin hunnak kan thuh i kan i sum peng ahcun a hnu a chuah than nak a phun ai dang i tih a nung chinchin tiah psychologist pawl nih an kan cawn piak. A thinhannak a that lo ningin a langhtermi  nih a tuah khawhmi a phun phun a um an ti:

1)   Mahnak in a derdeuhmi le a sual deuh tiah ruahmi hna kha si le cawnpiak peng. Kan ti theu lo maw? Voi zeizat dah kan chimh lai? tibantukin phunzai tlawhciar.

2)   Ka thinhannak thei uh, tiin chung le hawi le nih duhlo ningin sirleih in khuasak le bia chim. An duhmi tuah lo, an duh lomi tuah i zuam. Raw lei duh lo, leng chuah duh tibantuk in saupi um.

3)   Capo hamngin mi va thuat. Hmaitonh tein chim ngam tung loin capo i saihter i midang kha zapi lakah mual phoh va zalh. Capo ah rul sivai tarh i mi cuknak ah hman khi a si.

4)   Mi dang zei bia dah a in khawh lo bik lai tiin bia chia le tuanbia hlun kawl i mi ngiar. Silole hrawm thahri i rengh in au khuan i mi nih kan thei hna seh law kan mual pho lawlaw ti lungput neih.

5)   Hmurka in zei bia hmanh a chuah lo caah kutke in cabuai, thuhden, fale, minung hawi zuanhnawh.

Atu kan van chimmi hna ban tukin kan thinhannak kan langhter tawn caah nu le va i thennak, hawi ngaih ti lonak, rian in phuahnak, khrihfabu ah i tlum ti lonak te hna an chuak. Sihmanhsehlaw thinhannak cu sualnak a si lo. Kan Pathian zong Israel mi cungah siseh, Solomon cungah siseh, Sabbath kongah siseh, biakinn kongah siseh a thin a hang ve ko (Psalm 7:21; 1Siang.11:9-10; 2Siang.17:18; Mark 3:4-5; John 2:13-16). Jesuh Khrih nih Matthews 5:21 ah a chimmi hi thinhannak cu sual a si ti a si lo. Na thinhannak i teiter hlah titu a si deuh. Paul zong Efesa 4:26 ah na thin hunnak ni tlakter hlah ti ah a ti. Nan thinhannak kha na theih lai, min na sak lai, na ruah lai, cun remnak sernak, dawtnak hrampi ah na ser lai tinak a si deuh.

Khrihfami hna nih kan thinhannak hna hi dawtnak, zumhnak le ruahchannak a hram ah kan canter awk a si. Hawi le kom zong a uam in kan i uam peng ahcun hoi tha kan si kho. Nu le va zong a thuh in kan i thuh peng ahcun kan pum ai neih nain kan lungthin ai hlat chinchin. A linsami thinhannak chungin remhnak kan van ser tik lawngah i dawtnak tak, i zumhnak tak le hmailei ruahchannak tak a hung chuak. Cucu a thin hangmi khrihfa hna nih kan i tinh awk a si. Cun kan pawngkam ah kan hmuhmi dinlonak, nemnehnak, mah khua le mah peng lawng tanhnak te hna cungah hin kan thin a han awk a si. A thami thinhannak a ting co khotu si cio i zuam hna usih.

(Chirhchan cauk: An Angry Christian by Andrew Lester, 2003)

 

 

Categories: Artical

2 Comments

Leave a Reply