Biachim I Sumnak

Salm 41:3 II Bawipa, ka kaa ah hin ralvengtu ka chiahpiak law, ka hmur ah hin cawngtu ka chiahpiak ko.

David siangpahrang nih Pathian sin ah bawmh a halnak thlacamnak hi hmual a ngeituk hringhran. Zumtu hna nih nifa kan nun ah zohchunh tlak tein kan nun khawhnak ding le Pathian nih zumhmi kan si khawhnak dingah cun “ kan hmur le kan kaa” I ven khawh hi a si. Minung sinak in iven khawh hi a hartuk caah, Pathian sin ah bawmh hal in thlacamnak kan ngeih hi biapituk.

Zumtu tampi hna cu lihbia le mi hlen le biatha lo chim le phai tibantuk hi fawituk chim kan hmang, cucu caansau roh tik ah kan mah cungah phan than, ngeihchiatnak a chuahpi, ningzahnak a chuahpi, Khrih zumtu hna nun ah tih-nung bikmi cu lihchim le a simi lo mi hlen hman hi a si, midang ngeihchiatter le lungfahter hi Khrih zumtu hna nih hrial tak tak awk si. Zumtu ka si ti a theih ko nain mi-hlen le lihchim a hman peng ko rih ahcun Satan mission riantuan a bawmtu pei ka si ti i philh lo ding.

Zumtu tampi zumhtlak lo dirhmun le mualpho in a kan chia lengmangtu zong hi “ hmur le kaa “ kan iven khawh tawn lo caah a si. lihchim le mihlen hi zeitluk tih- a nun kha Siangpahrang David nih a penhtuk caah Bawipa sin ah lei le hmur le kaa ralvengtu ka chiahpiak ko tiah bawmhhal in thla a cam.
Phungthlukbia ahcun” mihrut hmanh hi dai tein a um ahcun mifim ah rel a si ati” cucaah hmur le kaa i ven khawh zong hi fim a si. Kan hmur le kaa iven khawh hi biapi taktak mi a si. James 3:7-10 “ lei hi um khawh lomi le hrem khawh lomi asi” a ti, cucaah zumtu nih cun kan lei kan hmurkaa hi biatha lo chimnak ah kan hman lo ding a biapitu, kan hmurka hin Pathian tthangthatnak tu chuak seh, sersatnak le thangchiatnak hna cu chuahter hlah usih. Kan hmur le kaa ahhin lawmhnak le ngeihchiatnak hna an um, Cucaah David nih “ Bawipa, ka kaa ahhin ralvengtu ka chiahpiak law, ka hmur ahhin cawngtu ka chiahpiak ko a ti” cucu Khrihfami kan nun ah biapi taktakmi cawnpiaknak a si.

Kan hmur le kaa nih midang ngeihchiatter lo ding le lungfahter lo ding hi a biapituk. Pathian zong nih midang ngeihchiatter le lungfahter hi a duh lomi thil a si, zumtu hna nun cu midang caah lawmhnak tluntertu le dawtnak nun ngeih ding hi a si caah, kan hmur le kaa hna hin midang kan ngeih chiatter lo ding I sum khawh hi a biapitakmi nun a si. Cucaah nifa kan nun ah kan hmur le kaa chuakmi bia hna nih hin dinnak bia le midang nun ah a thlummi bia a chuahter khotu si I zuam hna usih. Bawipa sawm bu tein kan hmur le kaa hi ven Khawh i zuam hna usih, Nifa kan thlacam zong itel peng seh. Bawipa nih thluachuahnak in pe ko hna seh.

Moses Lian Peng Ta Chungin

Categories: Sermon

Leave a Reply