Cancer Phun Hnih

Cancer zawtnak phun hnih a um: Taksa le uahnak cancer hna an si. Taksa cancer he uahnak cancer he minung an thah khawh veve. US ram a ummi minung million 330 chung in 2019 chungah minung 1,762,450 sin in taksa cancer zawtnak thar hmuh a si lai. Cu chung cun minung 606,880 an thi te lai tiah National Cancer Institute nih a rak chim chung. Uahnak cancer a ngeimi bel minung zeizat dah an thi ve lai timi rel awk a tha lo. Taksa cancer a ngeimi hna cu sibawite nih an theihpiak khawh hna i thlop khawhmi zong an tam pi. A luan ciami kum 25 chungah US ram chung cancer zawtnak in thihnak cu 27% a tum cang tiah kan hmuh. Thinlung auhnak cancer belte cu a ngeitu zong nih ka ngei ti an i hngalh lo caah damh a har ngangai. Thluak cancer dah ti lo cun taksa cancer zawtnak hin thih colh timi a um tuk lo. Cu bantuk in lungput cancer zong nih minung hi chikhat ah a that colh lo. Tksa cancer zawtnak zong hnu tuk i theih ahcun thlop khawh a si ti lo bantukin uahnak cancer zong nih duhsahte le i theih lo kar in a rak kan hrawk dih cikcek ve. Pathian nih a huat bikmi thil pasrih chungah uahnak aa tel. Hmanhseh, mi uah pawl kan cungah Pathian cu a lung a sau thiam (2 Peter 3:9). Nebuchadnezzar zong aa uah tuk ko nain Pathian nih toidor nun cawn caan kum khat a pek. Nain tih a nung tukmi uahnak cancer a ngeih kha aa theih lo caah kum sarih chung hramh a tam ter (Daniel 4:1-37).

Uahnak cancer cu mirum mi thawng lawng nih ngeihmi a si lo. Mi sifak, mi derthawm zong nih ngeih khawh a si ve. A cawisang tukmi zong an si kho i dai tein a ummi zong an si kho. John Piper nih hitihin a fainter:
1) Thil an tuah khawhmi, an ngeihchiah aa uah pimi hna an um. Mi nih kan thei hna seh, kan hngal hna seh ti lawng te an duh. Pathian vel a herh in an zum lo.
2) Thil ka tuah ding a tlam a tling sual lai lo i mi nih an ka thangchiat lai ti a phang i zeihmanh tuah loin mah le mah aa humzual pengmi zong mi uah an si ve. Pathian vel ka caah a za lo timi lungput an ngei.
John Piper nih a cunglei minung phun hnih hna nihhin Pathian an i bochan tak lo ti a fiang, a ti. Aa uahmi mi thawng pawl nih langhsar an duh. A dermi mi auh pawl nih i thuh an duh. An chungah minung sinak a thih veve rih lo caah Khrih vel a lut kho lo. Uahnak cancer nih sualnak dang a phunphun tuah khawhnak kutka a awn i mah le mah sualnak i hmuhkhawhnak kutka a khar (Josh Malone). Uahnak nih mah le mah i hmuhkhawhnak a hrawh i midang tlamtlinlonak le zei an si lonak lawng te a kan hmuhter.

Uahnak cancer nih a chap chih rih mi lungput tha lo hna cu: 1) duhning in thil a kal lo tikah thinhunnak (Anger), 2) ka duhmi paoh ka co awk a si ko timi hakkauhnawk (Greed), 3) midang nih an ngeih ve ko mi cung i hngahchuahnak (Envy), ka duhmi paoh ka tuah kawh timi taksaduhnak (Lust), mi nih an ka tei sual lai ti phan ruangah bia vaivuan vahpi (Gossip) te hna an si. Hi vialte hi ahohmanh nih fial lo in kan i uah raungah kan i phurhmi sual thilirt hna an si. A dawt tukmi minung a thahtu uahnak cancer cu Pathian nih a duh lo ti men a si lo. A huat in a huat (PTB. 8:13). Uahnak cancer nih minung cu rawhralnak ah a kan hruai (PTB 16:18). Uahnak nih minung cu a thumh lai i mah le mah aa thummi hna cu upatnak an co lai (PTB 29:23). Hi tluk tih a nungmi uahnak cancer in luat khawhnak ding ah lam pakhat lawng a um. Cucu mah kha vawlei ah i chiah i cunglei Pathian zoh khi a si. Nebuchadnezzar nih kum sarih chung saram a can hnuah Pathian kha chiat sirh loin cunglei a zoh i, “Cung Nung Bik cu ka conglawmh i Zungzal Hmunmi Pathian cu ka hlorh i ka thangṭhat,” a ti (Danieal 4:34). Cu tikah Pathian nih thluachuah vanluh vialte a chap chih. Zumtu nang le kei zong “Cu ka tuah kha ka tuah,” silole “Cu ruangah kha ruagah ka tuah lo,” tiin i horhlawt i excuse tuah siloin “Bawipa a hna a tlak ahcun, kan nung lai i cucu khakha kan tuah lai,” ti tu in kan lungput si ko seh (James 4:13-16).

Categories: Sermon

Leave a Reply