Chawva Cung Lungput

US ahhin dah phaisa hi kan herh khun rua. Zeizat va neih ahkhin dah a zaat hnga ti zong i hngal  lo tiangin phaisa kan duh.Hi kong ah, si tak lo nain zumtu tampi nih an i zumh sual lengmangmi thil pahnih an um. Cu hna cu: 1) Phaisa nih nuamhnak, dirhmun tha le himnak a kan pek khawh timi le 2) Rumnak hi Pathian thluachuah hmelchunhnak a si timi an si. Luatnak taktak cu 1) Phaisa kongah lungrethei le thinphang in um ti lo, le 2) Phaisa kawlnak caah nunnak le caan, thazang dihlak hman ti lo hna an si (Dr. Larry Osborne). Phaisa herhbaunak in luat timi a taktak cu phaisa neihmi tlawm le tam ah siloin phaisa cung i lungput ah khan a um deuh. Pathian nih cheuhrcheukhat, thawhlawm, thlaithar te hna a kan halmi zong hi kan chawva a herh ruangah siloin chawva cungah lungput hman kan neih khawhnak ding caah a si. A chawva tam chinchin kenter ngammi kan si khawhnak ding caah a si.

Randy Alcorn nihcun hitin a chim: Khrih kha na chawva le na neihchiah cung i Bawi a si lo ahcun nangmah na Bawi zong a si lo tinak a si. Khrih nih hitihin a chim ve: Na chawva a umnak ah nan lungthin zong a um ve (Mtt. 6:21). Cucu Paul nih a thinlung in ai sehchih ve i Efesa upa hna ro a vuih hna lio ah hmuhlei nak in peklei ah thluachuah a um deuh, a ti (Lam. 20:35). Lamkaltu chan lio Khrihfa hna cu an neihmi dihlak kha hmun khat ah an fonh hna i an herhning cio in an i thenphaw. Culioah hawi thil cu i hrawm a duh ve ko nain mah thil vial mi va hrawmh ve a duh lomi nupa hna an um. Cu hna cu Ananias le Safira nupa hna an si. Pathian sinah pek ding a simi an chawva cungah lih an chim. Mi ta vai hrawm cu duh ko nain mah ta mihrawmh a duh lomi lung put nih kanmah le kanmah lila a kan thah ti khi a kan cawnpiakmi a si.

Dr. Larry nih chawva sal in kan luatnnak ding ah lam dot thum a chim: 1) Nihin bak in cheuhracheukhat pek thok, 2) A dang cheuhracheukhat kha hmailei caah khong, 3) A tangmi cheu sawmriat khan i lung si tein nun i zuam. Pathian nih chawhengtu tha siter hmasa a kan duh. Minung menmen a simi nang le kei hmanh nih kan zumh lomi hna sinah kan chawva kan pe duh ve hna lo. Chawva cung i lungput a hmanmi lawng nih an chawva an i lomhpi. Chawva cungah lung hman lomi hna cu ralrin pek lengmang an si (James 5:1-5, 1 Timothy 6:17-19). Pathian nih a lungput a theih hnuah a lung a tling i thluachuah a pekmi hna cu an chawva an i lomhpi, an i thathnempi (PCT 5:19). Anmah zong an i lawm i vawlei zong a dam. Minung hawi dang nih an i thathnem pi. Cu bantuk mi hna cu caan tawite vawlei kan nun chung ah chuahchan neimi an si. Upat tihzah a tongmi an si. Khua le ram fanu fapa sersiam tu an si. Hi nunlam leiah a nung cuahmah mi caah thazang thar sisehlaw, a lut kho deuh rih lomi hna kan caah pemhfiannak si hram ko seh!

Categories: Sermon

Leave a Reply