Value in life

Christmas Thawngtha

• By Chan Lian
• 18 December, 2016
• No Comments

Russia ram i mission rian a tuanmi pahnih hna nih ngakttah cawmnak ah Christmas tuanbia an va chimh hna. Nu le pa nih hlawtmi/thih takmi hngakchia za reng lo nih an ngaih. Tuanbia an chimh dih hna hnuah naute Jesuh le cawrawl einak kuang an suaiter hna. Misha timi hngakchia pa nih a suaimi ah naute pahnih an cuang. Zeitidah naute pahnih in na suai tiah an hal. Naute Jesuh nih umnak inn na ngei maw tiah a ka hal i ka ngei lo, nu le pa zong ka ngei lo tiah ka leh. Keimah sinah ra a ka ti. Laksawng pek ding ka ngei lo i ka ra ngam lai lo ka ti ve. Jesuh nih, ka pawng teah na ih i ka khua na ka lumhmi hi laksawng vialte lakah a sung bik tiah a ka ti caah a pawngah ka ih ve, a ti (Donald Cantrell). Nang le kan caah hmunhma a ngei zungzal tu Khrih Jesuh a chuak cang.

a) Christmas nih a chuahpi mi ruahchannak

Rethei le thilrit mi vialte hna, ka sinah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang,” (Mtt. 11:28-30). Khrih sinah dah ti loah thilrit tthumhnak a um lo.

b) Christmas nih a chuahpi mi lungput

Nannih a no deuh pawl zong nih upa deuh pawl kha an nawl nan zulh hna lai. Nan dihlak in toidornak puan kha i aih u law pakhat le pakhat i bawm u, zeicahtiah Cathiang nih “Pathian nih milungpuam cu a doh hna i mitoidor cu a vel kha a pek hna,” a ti. Cucaah cun a ṭhawngmi Pathian kut toiah toidor tein khuasa u law amah nih a caan a rem a ti tikah an hlorh te hna lai. (1 Peter 5:5-6). Khrih dah ti lo cun a kan remter khotu le a kan cawisang kho tak tu ahohmanh an um lo.

c) Christmas nih a chuapimi lomhnak taktak

Thanh tuah, ka lungthin, Bawipa lianhngannak cu. I lawm tuah, ka nunnak, Bawipa na khamhtu cungah (Lk. 2:46-47). Bawipa thangtthat ah ai lawmmi si tluk in a thami nun a um lo. Sining cungah lungsinak ngeih tluk in a daidam mi nun a um lo. Khrih chuahnak kong khuaruahhar thil tampi a um ko nain zumg khawh lo ding pakhat hmanh a um lo (John Lennox). Zum tuah nan nung lai.