Chungkhar I Pehtlaihnak

Khrih thawngtha lawnglawng nih minung i pehtlaihnak a remh khawh. Rome pennak tangah khua a sami pa vialte hna nih nu le hngakchia cu lente celhnak bantuk men ah an rak hman hna. Kolose khuami hna zong cu nunphung ahcun an um ve caah vale nih nupile kha duh paoh in then khawhnak nawl an ngei. An ing voikhat an puan ah then khawh. Meh voikhat an khangh ah then khawh. An mui chiat i an i thurh hnawmh ruangah then khawh a rak si. Rome nunphung chinchin ahcun innchungkhar pabik nih a nupi le a fale cu thilri bantukin a hmuh hna. A duh le a thawl hna. A duh le a sal ah a zuar hna, leiba chamnak caah. A duh le a thah hna. Ahohmanh nih taza cuai khawh a rak si lo. Nau thar a chuah tikah a pa nih nung seh, nung hlah seh, timi biakhiahnak nawl a ngei. BC 1 kum lio ah Hilarion timi pa nih a nupi nau a ngei dingmi sinah ca a kuat. Pate a si ahcun rak nunter, nute a si ahcun rak hlawnh, tiah a tial (Papyri Oxyrhynchus 4.744).

Hibantuk chan le nunphung in vawlei a kal cuahmah lio ah Khrih sal Paul nih Kolose khua mi sinah a tial ngam mi thawngtha bia hi ro a ling ko ka ti. Nupi hna, nan vale nawl kha ngai hna u, cucu Khrihfa nan si bantukin nan tuah awk a si. Vale hna, nan nupi le kha daw hna u law bia hrang in ti hna hlah u. Ngakchia hna, Khrihfa nan si caah nan nu le nan pa kha upat hna u, cucu Pathian lawmhmi thil a si. Nu le pa hna, nan fale kha an ingpuanter hna hlah u, an lung a dong sual lai (3:18-21). Nu le pa nih an hlawnhmi  hngakchia hna a fimhlawm i mah fa bantukin a zoh tu hna cu Khrihfa an rak. Cucu khrih thawngtha a lianhngannak hmual a si. Rome nunphung nih cu fale cu pale duhmi rian bawmtu le upat lei zoh khenhtu men in a ruah lioah Pathian bia nihcun ro sunglawi an si a ti hna (Psalm 127).

America ahhin hlan lio Rome nunphung bantuk in fale zeiah a rel lomi le fale a biak in a biami nu le pa kan um tiah Zach Terry nih a chim. Fale a biami hna cu an fale duhnak tuah piak peng i zeitikhmanh ah “No” a ti duh lomi, fale kha 100 ah 100 in a tanh pengmi an si, a ti. Fale zei a rel lomi hna cu an caah caan a pe duh lomi hna an si. Cu bantuk pale hna tangah fale 100 ah 40 hi an tthang cuahmah, a ti. US i hrinmi fale cheuthum ah cheukhat hoi hna cu an pale min theih lomi an si, a ti. Cu tikah innchungkhar cu hell ram bantuk ah ai cang tawn. Paul nih Kolose chungah a tialmi thawngttha in kan fian khawhmi cu: 1) Nupi le zong vale upat an thiam kho ko, 2) Vale zong nupi a daw kho an si ko, 3) Fale zong anmah tein khua an tuaktan kho ve i nu le pa nawl zong a ngai kho an si, 4) nu le pa zong Khrih leiah fale cawnpiaktu tha kan si kho ko timi thawngtha a si. Thlacamnak he i zuam cio hna usih!

Chan Thawng Lian

Categories: Sermon

Leave a Reply