Eliajah: Khoika ahdah Na Ceunak Na Chiah? 1 Kings 17:1 – 19:8

Newin chan in atu Min Aung Hlain tiang kawl ram uktu hna le BC 900 in Rome cozah chan tiang Israelmi uktu hna hi an i lo ngai. Solomon siang pahrang a thih in Israel ram cu pahnih ah aa ṭhen. Chaklei ram cu Israel ti a si i Samaria kha an khualipi a si. An siangpahrang cu Jeroboam. Thlenglei ram cu Judah ti a si i an khualipi cu Jerusalem a si. An siangpahrang cu Rehoboam. Siangpahrang minung 19 nih an ṭuan i an dihlak in a chiahkha, an sualhar dih. Cu vialte lak ahcun a sualbik cu Ahab a voi sairhnak siangpahrang (1 Kings 16:29-34, Jeroboam hnu tlai) le leihpuaih ah a nupi Jezebel an si. Pathian an hlawt, Baal pathian an bia. An ram cu taksa thlarau in a mui. Cu lio te ahcun Prophet Elijah a hung lang. A min suallam cu “Jahovah cu ka Pathian a si,” tinak a si. Mei prophet ti zong in an auh fawn. Muihnak lakah ceunak petu dingah Pathian nih a thlahmi a si. A tuan bia theihmi um lo. Ram car Gilead in a ra. A sam sau, a kha hmul. A kalauk hmul in tahmi angki aa eih. Khuate fa si nain a pasal, a ral ṭha, Pathian Thlarau nih a umpi. Ruah loin Ahab hmai ah tut tiah a dir hung ko. Na sual tuk ruangah dap le ruah na ram chung ah kum thum le a cheu chung a tla ti lai lo, a va ti. 

Ho fa dah na si? Na ning hngal. Jezebel cu ti tloh in a tlok. Thetse ram ummi caah ṭih nung bik cu ruah sur lo a si. Zei dah an din lai? Zeidah an ei lai. Amah Elijah zong cu teh zeitin a nun lai? Khuaruah har thil voi 16 lakah a nunnak ca i a biapibik rawl kong aa tel ve. Voikhatnak ah langak a hman. Saram vialte lakah duh nung lobik zong a hmang khotu Pathian a sinak a hmuhsak. Voihnihnak ah Zarephath khua nuhawinu a hman. Vawlei cung ah chumh khat te lawng ngei i tlawmpal ah rawl loin a thi cang ding mi nufa hna zong a hmang kho tu a sinak a hmuhsak. Zeidah ṭih awk a um ti. Baal prophet 850 hmai ah sunparnak co chap. Nain minung a si ve. Vawlei nun hi tihphan dai lo a si. Jezebel khuachia nu nih text message a kuat. Dum chuh hmangnu nihcun nazi 24 chung ah na nunnak a dih lai a ti. A thing a phang hringhran. Pathian nih a ka hlawt tiah a ruah. Vawlei ah amah lawng tan takmi, hlawtmi ah aa ruat. Bawipa ka thah lawlaw ko, a ti. Voithumnak ah vangcungmi hmang in rawl pek le thawh ṭhan a si. Tho tuah. Rawl ei law ṭhawng ṭhan. Rian tampi ṭuan ding a um rih. Na ratnak lei ah kir ṭhan law siangpahrang thar va kawl, chiti va thuh. Nangmah zong na rian an changtu ding va kawl, a ti. Muihnak lakah ceunak phur ding i thlahmi zong muihnak ah pil khawh a sinak a lang. Hmanseh, Pathian mithim fale cu muihnak chung pil caan zongah amah Pathian nih a fuh ṭhan hna. Khuachianu kut in thih ding ah a siang naisai lo. A nung in van ah cawimi pahnihnak le a donghnak a si.

Nannih cu vawlei ceunak nan si, a kan ti (Mtt. 5:14-16). Muihnak in a khatmi mah nun ah, chungkhar ah, Kawlram ah, vawlei ah thlahmi Pathian ceunak kan si. A chel caan ah muihnak nih kanmah lila a kan khuh tawn. Muihnak karhtertu zong kan si tawn. Nihin cu vanmi nih an kan len cang. Ceunak nan si kha i philh lhah uh. Muihnak zamtak zong i tim hlah uh. Muihnak chung tu ah ceu uh, a kan ti. Arfi ceu cu zanmui lawng ah hmuh khawh a si bang, muihnak chung i kan um lawng ah kan ceunak a lang kho ve. Arfi tampi nih van cu ceunak in an par ter. Minu nih a pastor sinagh, “Ka rianṭuannak hmun cu a muih bak in in a mui, an sual tuk, an ṭha lo tuk. Rian kaa ṭhial a hau,” a ti. A pastor pa nih, “Cuka hmun cu zam tak ding ah siloin in va ceunak ding hmun ah Pathian nih an chiahnak a si,” tiah a leh. Chungkhar a muih caan ah, khrihfabu a muih caan ah, miphun le ram a muih caan ah phazawngdan pakhat te tal si khawh i zuam hna usih. Akn umnak hmun cio ah a pel tete in ka ceu cio ahcun van arfi hna bantuk kan si lai. Zam tak le zalawn kan i timh ahcun a mui deuh mi hmun kan phan ṭhiamṭhiam lai. A muimi cu ṭih a nung, ning a ṭi, thla a lau. Elijah zong nih a zam tak. Lungkua chungah a mah lawng, a li leng, a tlavai a king. Bawipa, ka thah lawlaw ko, a ti ṭhiamṭhiam. Vawlei kan nun chungah muihnak cu kan hrial kho lai lo. Hrial ding ah fialmi zong kan si lo. Kheng aa khuh ding kan si lo. Kutza i tlaih in biakinn vampang leng ah ceu ciahmah ding tu kan si. Kan kal tak hna lai lo, a zungzal in kan umpi hna lai, tiah Khrih nih bia a kan kamh (Heb. 13:5).

Categories: Uncategorized

Leave a Reply