Harnak A Thuatthuat In Ton Lioah

Lungkil thli tein Pathian he bia ai elmi na si tawn maw? Lungre a theih tuk caan, thil har tuk kan ton caan ah Bawipa kan auh cio. Kan ruahning in a kan leh colh lo tikah, ziah hme Pathian tiah kan aihram. A chel caan ahcun zumlotu hna le zumtu kan nun cuai kan thlai tawn. Ziah zumlotu hna tu an rum, an tthawn? Kannih vial kan sifah, harnak tangah kan um? Habakkuk nih Pathian bia a chalhnak zong hi ruangah a si. Cu lio chan ah a rak thawngbikmi cu Babylon minung pawl an si. An thawng, an puar, Pathian zeiah an rel lo. Pathian thimmi miphun ai timi Judah mi hna caah ral nganbik an si. Cucaah Habakkuk nih Pathian bia a chalh: Maw Bawipa, zei can dah nangmah cu kan auh lengmang lai i let loin na ka um lai? “A kenkip ah zaang-ennak lawng a um ko,” tiah na sinah ka au, Sihmanhsehlaw khamhnak zeihmanh na tuah hlei lo. Zeican dah ka au lengmang ko rih lai? (1:2).

Zumlotu zong Pathian nih a hman ve hna. A thimmi Judah mi phun an lung a fim lo tuk caah anmah chimhringtu ding ah Babylon pawl a thawnter hna. Sinain Babylon pawl cu biacaih an si ve than te lai, ti kha Pathian bialehnak a rak si. Babylon pawl nih Judah cu an tuk i an tei tak. Sal zongah mi tampi an kal pi hna. Sinain kum 56 a rauh tikah Medo-Persian pawl an ra i Babylon pawl cu an ci zong an hmih dih hna. Nihinni tiang Babylon mi pakhat hmanh an um ti lo. Judah mi cu an nung, an tthawng tthan (James Merritt). Pathian nih vawlei bia a caih peng ko ti a lang. Minung ruahning le hmuhning in siloin Amah Pathian timhning le caan khiahning in thil an cang lengmang. Cucaah harnak caan lio i Pathian i bochan, zumhnak ngeih hi hmual a ngeimi zumtu nun a si. Biacaihnak in kan luatnak hnga ding caah zumhnak lawnglawng hi Pathian nih a duh. Tuahsernak in Bawipa lung kan tong kho lo. Zumhnak thawngin miding ah a kan chiah. Bawipa cu a biakinn thiang chungah a um, vawleicung mi vialte hna a hmaiah dai zirziar in um tuah u (Habakkuk 2:20).

Minung kan duhmi paoh hi kan caah a tha dih lo. Kan duhmi kan i lawmhpi, kan i hlawkpi khawhnak dingah kan sining zong nih a phan thlu lo. Adam le Pathian nupi an halnak tialmi a um. Pathian nih nupi kan pek dingmi nih: Innchungtang a zoh dih lai, rawl an chumh piak lai, thil an suk piak lai, bia na khiahmi paoh a cohlan lai, fa an hrin piak lai i zan ah an tthang lai lo, amah nih a zoh dih hna lai, bia nan i al sual zong ah ka palh tiah an nawl peng lai, dawtnak le duhnak kha na herh caan paohah an pek khawh peng lai, a ti. Adam nih, a tha tuk lai. Keinih tah zeidah kan pek ve lai, tiah Pathian a hal. Pathian nih, na ban pakhat le na ke pakhat tiah a leh. Adam nih a ruah lengmang tikah a hlei ka ngeihmi cu ka hngakruh lawng a si tiah a leh. Cucaah a hngakruh pakhat he ai tawkmi Eve kha a pek (James Merritt). Bawipa caah kan zeidah kan sian ve? Kan sining tawk tein Pathian a mi hna cu thlua a kan chuah peng ko. Zeitik caan paoh ah lung dong loin kan Pathian i bochan ko hna usih! Theipi kung cu par loin, Mitsur ruang zongah a thei um hmanh hlah seh … Bawipa cu lawmh thiamthiam ko lai (Habakkuk 3:17-18).

Categories: Sermon

Leave a Reply