Value in life

Got a good friend? (Hawi Tha Na Nei Maw?)

• By Chan Lian
• 11 January, 2013
• No Comments

Lungre theihnak, ningzahnak le mah le mah dan itatnak hna nih ka nun a ka khuh tikah a celh in ka celh lo. Ka dang a car i rawl ka dolh kho lo. Ka lung a tur i zan ka it kho lo. Khua tha lo hna ka ruat i ka nunnak tiangin tih a nung. Ni khathnu ni khat ka derthawm i mi tha lo deuh ah ka cang chin lengmang. Rithainak hna nih a ka khamh kho hnga maw tiah le hrawk chintu ah an cang. Ka inntuarnak le ka sining ahodah ka chimh lai? Hawi tampi ka nei nain ka zum ngam hna lo. Nu le pa le u le nau ka chimh hna lai ka tiah an ka mawhchiat lai ti ka phang. Ka pastor ka chimh lai ka ti ah le misual na si a ka ti lai ti ka phang. Phungchimnak hoi hna zongah tahchunhnak ah a ka hman lai ti ka ruah ka tih tuk. Vawlei ah hawitha an har hringhran.

Minung kan thinlung a zawtnak le a damnak lam a hngaltu taktak cu a kan sertu Pathian lawnglawng a si. Jesuh Khrih nih ka zawtnak a theih bantukin ka damnak ding lam zong a theih. Ka tlinlonak a theih bantukin ka thatnak te zong a ka hmuh piak. Ka sining a umek in ka chimh tikah sual a ka phaw lo. Ngaithiam nak lam a ka kawl piak. Ngaih thiam awk tha loin ka sualnak a ngan tikah keimah nih kan inpiak lai a ka ti. Ka nunnak caah ka theih herhmi biatak hna kha ka chimh. Ka zulh khawh lo tikah a lung dong lo. Ka in khawh tawk harnaktu in a ka cawnpiak than. A zaw cangmi keimah cu a ka thawh than i mi tha deuh ah a ka ser. Jesuh ka hawi tha bik!

Nunnak hi a fawi deuh ti cu um lai lo. A tha deuhmi le a dam deuhmi le thei a tlai deuhmi nun tu kan herh. Cu cu kan hawi thabik Jesuh sin lawnglawng in a ra. Jesuh hawi tha asimi nang le kei zong kan hawi Jesuh bantukin ka minung hawi cungah lungput nei hna usih. Kan cungah a tuahmi thil hi midang cungah tuah khawh i zuam hna usih. Kan cung i a ngaihmi lungput hi midang cung i kan lungput siter i zuam usih. Kanmah le kanmah hi a hme tuk, a der tuk, a tha lo tuk ah i ruat hna hlah usih. Nai zoh tikah nangmah lawng nai hmuh ahcun na lung dong kho. Na phawrhlaw kho. Na hawi tha Jesuh na hmuh ahcun na dam lai. Biatak na duh lai. Thei tha na tlai chin lai.