Hngakchia le Jesuh

Hngakchia a um lomi Khrihfabu ah i pumh cu 1) A dai, 2) Biakinn a thianghlim, 3) Thlahdon hau an um lo, 4) Khan tampi zong a herh lo caah phaisa a tlo, 4) Sunday School Sy/m tbt ah a buai lo, 5) Sicak ding le ven hau zong an um lo caah hna a thiang tiin a fawizannak tam lengluang a um. Chunghar zong ai a tam tawnmi cu ka fale an le tuk, chimh an ngai lo tuk, thil an hrawk tuk, an thil hauh a tam tuk tbt zong a um lo caah lurit ding a tlawm saumau. Sineah hngakchia ngeih teh Khrihfabu le chungkhar nih i thim duh tak a si hnga maw? Khrih vawlei i a um lio ah hngachia hna kha an sinah an hun rat pi ve hna. Rian dang a tam tuk lio a si caah a zultu hna nih: Mi zeimaw nih ngakchia kha Jesuh sinah khan an ratpi hna i, an cung i a kut chiah awk le thlacampiak hna awkah an nawl; sihmanhsehlaw a zultu nih khan an rak sik hna, ti kan hmuh (Mtt.19:13). Anmah nihcun kan tuahmi a ttha ngai tiah an hmuh men lai. Voi tampi cu hngachia hna cungah kan chimmi le kan ruahnak hi zultu hna kan lawh caan a um ve lai.

Mah Khrihfabu hngachia cungah a lungsau ngai mi si ttung i midang bu i pumh caan hna a chet mi hngchia a rem lomi zong um khawh a si. Mah fale cu a tthatnak lawngte in hmuh i midang fale paoh an chiatnak lawng a hmumi zong um khawh a si. Ahofa le an si paoh cawnpiak tu i fial lomi nih cun va si cak len ding le, vatuaitam len ding le, va capoh lending an si lo. An nu le an pa kong hna va hal len ding a si lo. Thla kan cam piak hna seh, kan dawt piak hna seh ti lawng hi nu le pa cio nih duh a si. Cucaah  Jesuh nih cun aa thawh i, “Ngakchia cu ka sinah ra ko hna seh, dawn hna hlah u; zeicahtiah Vancung Pennak cu hi bantuk mi hna ta hi pei a si cu,” tiah a ti.An cungah a kut a chuan i a kal (V.14) ti kan hmuh. Zeitluk i manh lo le buaibai lio a si zongah a harbaumi, aa khong dengmi amah lawng a ummi hngachia hmuh ahcun thil dang vialte chiah tak in zohkhen le bawmhchanh ding hi Khrih nih a kan hmuh sak mi a si.

Khrih nih Hngachia le vancung Pennak a tahchunh hna. Vancung Penak hi thih hnu kalnak ding tiah chim lengmang mi Vacungkhua he khin ai khat lo. Pennak timi cu atu vawlei nun ah Khrih nih ukmi thinglung he nun khi a chim duhmi a si. Jakia nih vawlei thilri duhnak vila te a hlawt i Khrih a sawm tikah Pathian pennak cun nihin ah na innchungkhar ah a tlung cang a timi nih a fianter khun. Huatnak, nahchuahnak tbt vawlei nun nih a tlaihchan hna nih a uk rih lomi hngachiah hna he a tahchunh. Hngakchia cu an i sik zong ah nazi pakhat hlah ah an daw tthan kho colh. Nikhat caah an herhmi pek ahcun nuam tein an ei, an hruk, an i celh. An mit a kuh caan ah tha dam tein an i hngilh. Thaizing kong ah an lungre a thei lo. Pathian hi kan nu le kan pa bantukin ruah khawh ve i nikhat ca kan nunnak caah kan herh a kan pek ahcun lung dai tein nifatin liam ter khawh khi chim duhmi a si. Kannih cu hmailei caah kan lungre a thei. A luanciami kong kan ruat tthan tikah vawlei nih lungretheihnak a kan pek cingcin. Lungretheih le thinphannak nih a kan dohter, taksa le thinlung thaba tuk in a kan chiah tawnmi hna hi sehtan pennak tang i um he khin a vai khat ko. Mathai 6 chungah nikhat nih a chuahpi mi harnak hi a za ko, thaizing kong ah na lung thei hlah, a kan ti. Cun kanmah nih thla kan cam long siloin a sin kan panh ahcun Amah Khrih hrimhrim nih thla a kan campiak ve ti ti thawngtha a si.

Categories: Sermon

Leave a Reply