Hngakchia le Upa

Hngakchia nute le a nu an vai i pum. Pumh lioah a fanu te cu a zaw pah i a luak nih a hlawh. A nu nih va chuak law hauhruang kam ah va lua ta tiah a ti. A fanute cu a va chuak i a luak dih khawh in a rak kir. A nu nih, khoi ka ahdah na luak, a ti. A fanu nih cun hauhruang tiang kal a hau lo, kutka kam ah “Mizaw caah” timi pung an hun ko, a ti. Hngakchia nihcun an lung chuak paoh an chim, seihkuzin ah an nung, an duhmi paoh an ei, an din, an tuah. Mi nawl kip an cawn. Keimah ca, keimah nih, keimah lawng, timi ah an dir. Seihkuzin vawlei ah khua an sa. Zeicahtiah cun an khuaruahnak hawi a canh rih lo caah a si. Cucaah ahopaoh nih hngakchia cu kan ngaih thiam hna. A thei rih lo i si kan ti. A upat deuh tikah a lungfim te ko lai kan ti. Minung phung a si.

Capo thiam pa nih, “Mawtaw hnulei thuhnak ah hngakchia an i dai ahcun accident ton khawh a si, mino an i accident ah cun hngachia an chuak,” a ti bal. No deuh lio caan ah taksa duhnak nih a kan den. Pumsa chikkhat nuamhnak vialte tuah dih kan duh. Nun hnawhchan cu nuamhnak kawl hi a si timi Hedonism nih kan nun a uk. Tlangval pa cu zuu dawr a kal i voikhat cah ah hrai 5 ai cah. Dawr nei pa nih, ziah mahtluk rang cun na din? tiah a hal. Tlangval pa nihcun, pia 50 lawng ka nei i a ba si ti na theih ahcun na ka pe duh sual lai lo, a ti. Mino nih hnulei hmailei ruat bak loin nuamhnak kan kawl. Tih ding thil vialte kha kan ngamhnak nih a tei tuk. A der kho lo ding, a zaw a fak kho lo ding ah kan i ruah. Zei si khawm ah a lungfim te ko lai kan ti. Chikkhat nuamhnak nih caansau fahnak a chuahpi ti cu duhsah in kan hung fiang taktak. Minung phung a si.

Palhnak phun zakip, zawtnak chia phunphun, thihnak horkuang in Bawipa nih a kan luatter i nutling patlang kan hung si cang. Taksa duhnak ah a za tawk in ri kan i khiah khawh cang. Tih awk le hrial awk kan hngalh cang. Thiamnak a phunphun zong pek chih kan si rih. Cu lioah duhfahnak nih a kan  den than ve. That kan i cuh, hmunhma kan i cuh, phaisa nih a kan sal, mi kan hngah chuah, nautat nun kan nei. Duhfahnak nih a kan tei thai ahcun kan thlarau a thi lai. Kan chungkhar kan vawlei kan hrawh dih cikcek lai. Hihi cu Pathian phung a si ti lo. Hi lungput he kan tar dingmi hi tih a nung tuk hringhran. Cucaah Mithiang Paul nih: Ngakchia ka rak si lioah ka biachim le ka thil hmuhning le ka ruahnak cu an rak ngakchia ngai. Atu cu upa ka hung si cang i ngakchia ruahning in thil ruah kha cu ka duh ti lo, a ti (1 Kor. 13:11). Zumlotu nihcun a hmun lomi vawlei thil ah an nun pek an ngamh. Sihmanhsehlaw, Pathian a thei i a bia a zummi nih cun a hmunmi dawtnak le ipeknak nun tu kha an i thim.

Categories: Theological paper

Leave a Reply