Hngalh Theng Lomi Pathian Mi Hman Hna (Jeremiah 39:15-18)

Voi khat cu pastor pa a zung khan ah thinhun tak in a member pakhat a ra. Pastor pa cung i a lung tlin lonak cu a bungh in a hun bungh. A chimmi cu bia vaivuan a hman lomi lawngte a si. A bia a dih in a pastor cu hung ka let tiah a hro. Pastor pa cu a tho i sink ah pakaan in in ti a va than i a hung kir. Mipa nihcun zei caah mah cu na va lak, a ti. Pastor pa nih, na chimmi hi a hman lomi an si ko zong ah ka cungah na thin a hung ti ka hmuh caah ngaihthiam kan hal. Na ke tu kan tawl lai, a ti. Mipa cu a thinlung a kekkuai i mitthli he a lawi. Cu thawk in Khrih dawtnak tette a khang (Palitha Jayasooriya). Mah pastor pa hi a min zong theih in hgalh len mi a si lo. Hmanhseh Pathian saltha taktak a rak si. Cu ve bantukin kan Bible ah hngalh tuk lomi Pathian sal tha an um ve. 

Ananias hi kan Bible dal khat lawng ah a min a lang (Lamkaltu 9). Sual nih Damascus khua i Pathian biatu hna an i pumhnak hmuh kip ah va kal i zumtu hna va tleih awk ah aa tim. Nawlngeitu bu sinah nawlpeknak ca a lak. A mithi le lalang hna he Damascus lei i an kal lio ah Khrih nih ceunak he ba a ruah. Nithum chung khua a hmu lo. Cu lioah Pathian nih Ananias cu a auh i Judas inn ah aa hrim liomi Saul va ton awk ah a fial. Tih a nung tukmi na ka fial a t i nain a thin phan bu in a va kal hnawh. Ka unau tiah a va auh pinah a lu cungah a kut a chuan i thla a cam piak. Saul cu a mit a au i tipil a ing colh. Huam lo bu, tih bu tein Bawipa fialmi tuah tik ah Pathian lianghngannak aa phuang. Saul cu Mithiang Paul ah a cang.

Ebed-Melek hi Cushite mi a si i siangpahrang Zedekiah tang riantuantu bawi pakhat a si. Mah lio Profet cu Jeremiah a si i Zedekiah nih a ngeihmi bawi hna nih leicet in a khatmi khur ah thong an tlak lio can si (Jeremiah chapter 38:1-13). Siangpahrang tang i riantuantu bawi hna nih Jeremiah cu thah ding a si, a chimmi vialte hi miphun rawhnak lawngte si tiah taza an cuai cuahmah lio a si. Ebed-Melek nih siangpahrang cu ral tha tein a ton i hi prophet hi a si lo ning in taza an cuai, amah a thih ahcun ka khuapi ah rawl a um ti lai lo tiah a va chimh. Tuanti a hawile nih huat khawh, taza cuai khawh a si ve. Hmanhseh, siangpahrang thinlung ah Bawipa nih rian a tuan i Jeremiah cu luatnak a hmuhter. Cu pinah hri sawhsawh in dawh than ahcun a hma a fak tuk lai a ti i a kut mennak dingah puan nemnem a chanh. Ebed-Melek hi a min a thang lo nain Pathian nih, nan nun chung kan kilven lai, tiah bia a kamh mi a si ve.

Min theih lomi mino pa nih min a thang bikmi, Pathian nih ka thinlung hngaltu tiah a kawh (Lamkaltu 13:22) mi David cu Sual innchungkhar ah a phakter (1 Samuel 16:18). A thlarau a zaw tuk cangmi Sual siangpahrang hnemtu ding ah David timi pa te music thiammi, palek a um tiah a va chimhpiaktu pa kha a si. David cu siangpahrang na si te lai tiah chiti thuh a sinain a si hlan ah siangpahrang kong tampi cawn a hau. Cu lam awnhnak ding ah mi nih theih lomi pa kha Pathian nih a hman. Zumtu paohpaoh hi Pathian nih thil lianngan pipi chuahternak ding ah a kan hman khawh dih. Fialmi rian el lo tu hi a biapi bik a si. Dorothy Collins, sianginn cachim bawmhnak in Cuba nu Gloria Estefan cu hlasak minthang ah aa chuah. Mirang holh a thiam lo. Hawile nih fak piin nehsawh a rak tong. A sayamah bawmhnak in holh a thiam i minthang aa chuah. “My year one teacher didn’t just teach me the language; she helped me find my voice’’ (The Reader’s Digest magazine). 

Categories: Uncategorized

Leave a Reply