Value in life

How You Know The Truth of People (Mi Kong Hngalhkhawhnak)

• By Chan Lian
• 9 February, 2013
• No Comments

Vawlei mifim kan timi hna cu minung le thil an sining a thei khotu an si, tiah Dr. David Van Bik nih a rak chim bal. Vawlei thilri le a chung ummi minung hna kan sining hi theih hngalh khawh taktak a har ngaimi a si caah minung thinlung hna hi cu sertu Pathian lawng nih a theih khawh tiah a zummi an um. Minung kan si ve bantukin kanmah le kan theih khawh, hngalhkhawhnak pedaan hmang in thil le minung hawi kha kan zumh, kan huat, kan fak, kan soi, kan lomh, kan mawhchiat ve cio hna. A biapi ngaimi pakhat cu thil dik le minung an sining tak hi zeitindah theih kan i zuam tihi a si.

Thilri le saram cu minung holh an thiam lo caah minung nih an kong theih duh tikah an sining kha mit in ngiat, thluak in tuak hnuah a buaktlak in (quantitative research) khiah a si. Minung kong an sining tak theih duh ahcun phun hnih in tuah a si ve. 1) A thi ciami cu an nun lio i an kong a thei bik tu kha va hal an si.

2) A nung liomi hna cu anmah he i komh khawh i bia an ruah ngammi na si pinah an bia ngaih khawh a hau (Modern social research theory). Bawi Jesuh zong minung kan sinah a rak ratnak hi kan sinah a um ve hnu lawng ah a kong kan theih khawh lai ti a hngalh caah a si (qualitative research).

            Mi chimnak, mah purhdahning, duhpiaknak ngaihmi hna pawl hmang in mi kong kan chim tikah kan i palh lengmang. Mifim lo ah kan i cang. Martin Luther King, Jr. nih, mi vialte nih chiatnak he thatnak he kan i ngaih dih. Kan thatnak zongah tlinlonak a um ve thotho i kan chiatnak tampi lak zongah santlaihnak a rak um ve tho a rak ti. Khrihfa holh in chim ahcun kan chung ummi Bawi Jesuh kha i hmuhpiak  khawh cio kan herh. Bawi Jesuh siloin settan tu kan i hmuhpiak tikah a hmutu maw a palh theu tawn, hmuhpiakmi pa/nu dek, tihi ruah a hau.

            Hmun kip ka kip ummi Laimi mi tlawmte hna nih pakhat le pakhat kan i tahnak kan pedaan hi thachoter cio hna usih tiah kan sawm hna. Mi dang kong kan theih tak duh ahcun komh khawh le a bia ngaih khawh i zuam hmasa a herh. Fiang tein hmuh khawh ahcun sermi thil vialte hi Pathian lamkaltu an si dih, timi hla kha thazang laknak ah hmang hna usih.