Hramthoknak Maw, Donghnak Judges 13-16

Kawl nih a hram thok a ṭhat ahcun a donghlei cu hna ngam a si, an ti. Hramthoknak ṭhat cu tha a nuam, ruahchannak a tam. Khat te lei ah hram thoknak ṭhat ngai ṭung i donghnak zohdawh lo a um kho ve. Zawtfah ruangah maw, a dangdang accident thil ruangah faknak ton silole thihnak ton  zong a um kho. Hrial awk ṭha lo. Duh thimnak i palh ruangah nun a donghlei chiat ngai khawh zong a si ve fawn. Adam ruangah misual cia in hrin kan si tiah a zummi si zong ah el awk a ṭha lomi cu duhthiamnak kan ngeih cio mi kong hi a si. Paul Tillich nih, “Minung a simi paoh nih atu le atu te hi biakhiahnak kan tuah dih. Mah biakhiahnak belte cu Khrih ca i tuahmi le Khrih ralchanh in tuahmi tiin an i dang,” a rak timi hi a hman. Bia kan khiahmi cungah kan mipum cu a cawl. Biakhiahmi aa palh ahcun nunnak a donghlei zoh a chia, duh a nung lo. Nihin ah Khrih ca i biakhiahnak kan tuah khawh ahcun nunnak a tang rihmi caah ruahchannak a um ṭhiam ṭhiam. 

Saul cu aa thoknak a ṭha. Judah Judas Iscariot zong zultu ah thiam a rak si ve. An donghnak cu ṭih a va nung dah. Kan uar ngaimi Samson, a min i a suallam cu “Sunny” ni ceu dawh tinak a si. Judah mi a pahleihnihnak le a hnubik biacaihbawi a si. A chuah hlan in Pathian nih thim ciami a si. Nazirite (A hlei in dammi, zu ding lomi, a thi cangmi paoh a tawng lomi le a sam saumi miphun) mi a si lai, Israel mi hna an ral in chanhtu a si lai, tinak a si. Pathian Thlarau thawng in: 1) A kut ro in Timnah ah chiahdeih a thah (14:6), 2) An thil puan chuah duh ah minung 30 a thah hna (14:19), 3) Cenghngia zathum a tlaih hna i Philistine  hna lo a duah nak ah a hman hna (15:4-5), 4) Laa kharuh in minung 1000 a thah hna (15:-14-15), 5) Gaza vanpang kutka a bauh dih hna (16:3). Minung fa nih tei ci a si lo. A donghnak bel ah Pathian ral a simi Philistine pawl nih an tleih (16:19). A mit pahnih in an khauih. An nehsawh, an thlanglamh. An tlaikho pathian Dagon sunparnak peknak caah an hman. A poi bikmi cu Pathian Thlarau nih a ka chuah tak cang ti hmanh a hngal ti lo (16:20). Mah ṭhawnnak lawng sang tuk in i hmuh ahcun Pathian Thlarau nih um pi khawh a rak si ti lo. 

Thih lai teah khamh co khawh a si. Vailam cung zongah mifir pa nih khamh a co ve. Samson zong nih a thih lai teah Pathian Thlarau a co ṭhan ve. Mah belte, Bawipa caah nunnak caan an ngei ti lo. Pumpak biakhiahnak an ngei kho ti lo. Caan ṭha a ngeih lioah Sampson nih a ṭhawnnak cu amah duhtlinnak caah a hman. A lei aa sum kho lo. Mi dehcawh a huam.  Nu pakhat sinah thlarau dihlak a bungh. A miphun hawi nih chimhmi zeihmah ah a rel lo. A ral hna cu a tei lengmang ko nain amah le amah aa tei kho lo. Hebrew minung lakah biacaih bawi rian tiang a ṭuan nain rian a petu Pathian he pehtlaihnak a ngei lo. A hmuh khawhmi dihlak cu a sam le a ṭhawnnak lawng a si. Pathian thim ciocio mi an si nain Saul nih a nun cu vawlei sunparnak caah a phum (1 Sam. 28), Judah nih mi ṭhalo sinah a nun a pek (John 13:30), Samson nih a taksa duhnak caah a nun a thah. Phungthlubia 17:8 ah hramthok nak nakin a donghnak a biapi deuh tiah aa tial. Chikhat te lawng a tangmi a nunnak caan te ah Samson nih Pathian a auh.  A hlan a nun vialte nakin teinak ngan deuh a hmuh ta. Ka mi hna nih an lung an i ṭhumh i ka sinah thla an cam ahcun: 1) An bia ka theih lai, 2) An sual ka ngeihthiam hna lai, 3) An ram ka dam ter lai (2 Chronicles 7:14). Hawi dawt, caan a um rih ko dah kaw!

Categories: Sermon

Leave a Reply