Kan Caan Sung Lawi

Kum le caan cu an liam cuahmah, Pathian khuakhannak in. Caan ttha he caan chia he an liam. Upa kan upa chin. Hngakchia hna zong an hung nungak tlangval cuahmah. No lio ah upa zokzok kan duh. Upat deuh ah no lio kan ngai. Mino si maw ttha deuh, upa si dah ti zong fian a har cang. Hnulei caan ah tuah sualmi/tuahtlawrhmi ruangah khuaruahtam in a ummi kan um. Cu ve bang, hnulei caan i kan dirhmun ttha nih lunthin a puamtermi zong kan um kho. Hmailei caan ruah ah lungrethei in a ummi kan um ve tthiamtthiam. Cu ve bang, hmailei caan phak lai aa ngaihmi zong kan um ve. A luancia caan kha Goodbye ti khawh a hau. Hmailei caan tu hi Hello ti ko hna usih. A tang rihmi kan caan hi a sunglawi bikmi Pathian laksawng a si.

Kan caan a tang rihmi hi zeitin hman kan i timh cio. Zei huaha lo (wasted) caan an si sual lai maw? Thil pakhat nih suai (addicted) in kan liamter sual lai maw? Midang cungah thil ttha lo (violated) in kan hmang sual lai maw? Midang thil tuahmi soisel (critized) nak rumro in kan hmang sual lai maw? Zeitluk in dah kan caan a tawi tihi hngal usih law hibantuk hna ca menmen ah kan caan kan hmang siang lai lo. Kan caan hi kanmah duhnak in hmang ding a rak si lo. Kan herhnak tu ah hman awk an si. Kum 95 tiang a nungmi upa tampi bia an hal hna. Zeiruangahdah nan chan a sau?. An lehnak a tam u cu, nihin lawng ka nung cang lai tiin lunglawm tein kan nung an ti. Thih zong ah i chir lo ding in nun khi a si.

Kan ni caan hna chungah kan i lomh khawhnak lam a um ko. Cucu pekchanhnak ah a si. Kan dam, kan nung, Bawipa thawng in. Kan ttuan, kan hmuh, Bawipa thawng in. Chungkhar, hawikom, khrihfabu kan ngei, Bawipa thawng in. Lomhnak tak cu i peknak in a chuak. Bomhmi, pekmi sinak in chuakmi lomhnak cu chikkhat lawng a nguh. Kan caan midang caah va pek, a sunglawi tuk. Kan thazang mi derhtawm caah va pek, a sunglawi tuk. Kan chawva mi sifak caah va pek, a sunglawi tuk. Kan nunnak Bawipa ca i i pek, a sunglawi tuk. Nifatin Bawipa ah i lawm hna usih. Chungkhar dihlak caan ttha hmang cio hna usih. Na caan a tang rihmi hi a sunglawi bik a si.

Categories: Artical

Leave a Reply