Kan Dinmi Ti le Khrih Kong

Minung hi ti loin ni sarih cung kan nung kho lo an ti. Ti din loin nithum in ninga hnu ah zeihmanh kan pum ah a lut kho ti lo. A luh hmanh ah a chuak kho ti lo. Kan pum chungah ti hi a tlawmbik 60% ai tel. Cucu kan thilri dang vialte tha tein an cawl khawhnak hnga caah a si. Kan dinmi ti hi khawikain a rat ti ruah ah Pathian sunparnak a lang.

Vawlei cu rili ti nih a kulh. Rili ti cu a almi a si i minung, saram thingkung nih din awk tha lo. Cite nih a alter. Cu rili ti cu a khu in van ah a kai i cite kha a kal tak. A khal hnuah a ti than i ruah in vawlei ah a phan than. Minung le saram kan caah a sannak in a niam nak ah a luang i kan din, kan hman khawh. Thiangkung caah a niamnak in a sannak ah a kai fawn. Cuticun nunnak a neimi paoh kan nunkhawhnak a si. Minung nih ti kan din hau, Saram nih ti an din hau. Thingkung  nih ti an din hau. Rili ti cu a cung leiin a kik hmasa i a khal zong a khal kho. A tang leiah nga hna an nun khawh ding caah a si. Cu rili ti a khut khawhnak ding le tlawt lo tein a um khawhnak ding caah nika le thlapa nih rian an tuan. Cu rili ti thiamthiam cun kan herh bikmi cite cu ser a si fawn. Hi thil vialte ruah ah Pathian thilser a lianhngan ning kan hmuh khawh. Kan din ti hmanh kha a herh tikah a niamnak in a sannak ah a luanter khotu Pathian a si.
Eden dum bantuk nun kan ngeih khawhnak caah tiva kan herh zia Genesis ah kan hmuh. John 3 ah Necodemus kha ti le thlarau in na hrinthan a hau a ti. Kan pum hi ti le Pathian thlarau in sermi kan si zia i hngalh dingin Jesuh nih a cawn piak. Sermi kan si caah sertu nih tinh piakmi a kan ngeih. Cucu amah sunparnak langhter le a pennak kauhter ding caah a si (Psalm 100). US phung ning cun kum 21 kan si hnu cu kanmah duhthimnak in zei paoh tuah khawh a si. Co ding le in ding zong kanmah thiamthiam kan si. Pathian sermi kan si caah Pathian zei kan rel lo ahcun in ding tu kan co lai. Co ding tu kan in lai. Minung cu sermi kan si caah sertu Pathian he kan i pehtlaih lo ahcun kan pum chungah a herhmi ti le thlaurau a zawr lai i kan thi lai. Sertu Pathian he zungzal kan i then lai. Khrih nih a kan pekmi ti kan din tu ahcun zungzal nunnak kan ngei lai (John 7; John 4). Va panga a neimi nu caah Khrih nunnak ti a um peng. Nang le kei ca zong ah chiah cia in a um ve. Khrih ti a ding cangmi cu an ti a hal ti lo, Amah sunparnak caah an nun an hman. A ti a hal than pengmi kan si ahcun Khrih ti taktak ding hna usih.
Chan Thawng Lian
Chirhchan: http://www.everystudent.com/features/isthere.html;
Categories: Sermon

Leave a Reply