Khrih Thlarau Ah A Thang Cuahmah Mi Nun (1 John 2:12-14)

Khrih nih Amah zumtu kan dihlak hi Thlarau (KHRIH) leiah nutling patling chin lengmang si hna seh ti a kan duh (Eph. 4:15; Heb. 6:1). Bible cawnpiaknak ah a min thang bik pakhat a simi Warren Wiersbe nih Thlarau in a thangmi khrihfa kan i tahfung kong hi khrihfabu tampi ah a buai taktakmi thil a si, a ti bal. Pastor a tuan cuahmahmi keimah pumpak zong hi Thlarau leiah ka thang maw thang lo ti kaa tah lengmang ve. Cu tahnak ahcun zedah pedan dah kan hman cio hnga? Thawngha chim thiam Pastor James Merritt nih cun zumtu tampi nih Thlaurau lein than timi le lenglei langhnak in than timi hi kan cawh sual lengmang a ti. Zarh tinte i pumh, thlacam ah kal, upa tuan, hruaitu si, Sunday School ah i pek tibantuk in Khrih ah a thangmi kan si le si lo kan tah tawn, a ti rih. Sinain kumkul reng lo Bible cawnnak ah aa tel ko nain Khrih leiah a nun a thang lomi ka member tampi an um. Zarhtin an i pum ko, khrihfabu hruaitu zong an si lengmang nain an lungput le an nun ah thannak a ngei lomi ka member tampi an um tiah Pastor Merrit nihcun a peh chap. Tuchun zumtu kan nunak ah kan kum lawng a upat i kan chunglei lungput ah hngakchia te kan si rih ko ahcun mi van chia ngaingai kan si hnga. Sinain atu hi kan caah thannak caan tha asi rih caah mi vantha thiamthiam kan si rih.

Khrih ah nutling patling sinak lei i than khi khrihfa mi hna i kan hmuitinh a si. 1 John 2:12-14 ahkhan zumtu ciocio a simi phunthun ah then kan si. Pakhatnak cu hngakchia bantuk zumtu. Khrih dawtnak kan theih ka ah khin Thlarau lei hngachia te kan si rih. Hngakchia te nihcun amah kha nun laifang ah aa chia i a duhmi paoh tuahpiak ding lawng kha a kawl. A duh ningin si dih seh a ti. A duhnak tuahpiak tik zongah kaa lawm ti hmanh a chim thiam lo. Midang caah a tuah mi cu diaper cungah fimtawl ding chiahpiak lawng a si. Cucu kum nih a neih lo i chunglei kan lungput tu in tahmi a si. Pahnihnak cu mino pawl an si. Mino hna cu an kum a than bantukin Khrih leiah an than ve awk a si. An thannak ding caah midang rinh ti loin anmah tein than ve a hau cang ti hun i theih khi a si. Pekchawm cawhnuk lawng ei ti loin anmah tein rawl hak ei hram hun i thawk khi a si. Mah tein Bible rel ve cang, mah tein thla cam ve cang khi a si. Pathumnak cu pa dirhmun phak khi a si. Pathian tuahmi kong theih long si ti lo. Pathian bia mi nih chimh chawmmi theih lawng a si ti lo. Amah Pathian hrim kha pumpak theih i midang hrawm khotu dirhmun tiang in nun khi a si.

Thlarau leiin than timi cu chikkhat ah vukvak tiin than khi a si lo.A si zong a si kho lomi a si. Mah hrimhrim nih than duh a hau. Ka thang hrimhrim lai tiah bia i khiah a hau. Thannak ding caah tuah hrimhrim a hau. Ngol lo tein pehzulh i a theipar zun tiang ngol lo a hau. Thlaurau in a thang cuahmah mi hna i an theipar cu nun caan ziaza le tuahtuannak ah a langh awk a si (James 1:22; 3:13). Thlarau leiah a thang maw thang lo timi tahnak cu chunglei in a chuakmi lenglei an theipar in a si. Thlarau nih a chuahtermi theipar hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, toidornak le mah le mah i tei khawhnak tehna hi an si. Caan tampi ahcun vawlei thil kan duh lomi, a harmi phunphun nih a kan den cio tikah, Thlaurau theipar pakua chungah pakhat te langhter hmanh hi kan i harh cio ko lai. Sihmanhsehlaw kan tonmi thil har hna hi Bawipa mit in kan zoh khawh a si ahcun nutling deuh patling deuh si ding ah an kan hneksknak le lamhmuhsaknak hna tu an rak si tawn.

1. Ralkap Training
2. Ihkhun in a tlami
3. Socrates le siahngakchia pa
4. Bible cu kan GPS
5.At the board meeting, the examiner reported on the interview. “He has all the qualifications for a fine missionary. First, I tested him on self-denial, making him arrive at my home at five in the morning. He left a warm bed on a snowy morning without any complaint. Second, I tested him on promptness. He arrived on time. Third, I examined him on patience. I made him wait three hours to see me. Fourth, I tested him on temper. He failed to show any anger or aggravation. Fifth, I tried his humility by asking him questions that a seven-year-old child could answer, and he showed no indignation

Categories: Uncategorized

Leave a Reply