Lai Trap (Lai Rap)

Hngakchia lungthin tthanning a theitu mifim hna nih, minung cu kan hngakchiat lio tein kanmah duhnak a tlinnak ding ah zeipaoh a tuah i a cawlcangmi kan si an ti. Kan nu le kan pa bia kan ngaih mi zong khi ka daw hna seh ti kan duh bia a si an ti. Daantat le laksawng pek, mawhchiat le fak timi pawl zong hi minung pakhat kha kan duhning in nung seh ti kan duh ruangah kan tuah tawnmi thil an si an ti. Mi pakhat hi kan thangthat tikah kanmah duhning in a um caah maw siloah kan duhning in um peng seh ti kan duh caah dek kan thang tthat tawn. Kan mawhchiat hna zong ah khin amah i thleng seh ti duhnak tak khi si lem lo in kanmah duhning in a umlonak kan langhtertu khi a rak si tawn. Hi minung psychology hi hruaitu upa hna le pastor te nih kan i foih tawnnak rap a si ttheu.

Upa hna le pastor rian kan tuannak ah mah minung psychology hi kan i fian ahcun “rap foih” nak in kan luat deuh lai. Phung kan chim tikah “Saya pa, na thiam tuk, na chimmi a tha tuk” an kan ti ahcun kan tha a nuam tawn. Phung kan chim lioah mi pawl an ngut dih ahcun kan tha chia tawn. Cu cu kan chuah ka tein kan i thanpimi lungput a si. A ruang cu fak kan duh, dawt kan duh, rak uarmi si kan duh. Cu duhnak cu a tha lei in kan hman thiam ahcun fakpi in i zuamnak le daithlan lo le fakpiin i timhtuahnak hna a chuahpi. Khattelei ah cu duhnak kan ngeihmi cu Satan nih lohma tha ah aa lak tawn i mi  zapei cungah a kan lam tertu ah a cang tawn. Mi pakhat nih a kan fak tikah lung tak in a chimmi siloin amah duhnak tuahter peng  ding ah a chimmi a si kho.

Mi nih an kan fak tikah le an kan thangchiat tikah mah pumpak in i koih loin zeidah a chimtu nih a duhnak a si timi le zeidah keimah sinin ai ruahchan timi tu hi kan tuak deuh ahcun rap in kanluat deuh lai. Mi va fak le va thangchiat hi a chia a ttha ti duhnak a si lo. Fakmi le thangchiatmi nak in faktu le thangchiattu an lungput theih khawh hi a biapi. Khua pakhat nih an upa pakhat kha upatnak an pek tikah upatnak pekmi pa nih a ruah deuh dingmi cu “keimah hi ka ttha, ka fim” tinak in “kan khuami nih zeidah tuah rih seh ti an ka duh” ti tu kha a si deuh. Thangthatnak kan comi le faknak kan tonmi hna hi Pathian nih a kan fialmi rian kan ttuan khawhnak ding caah a si ahcun a ttha. Minung pumpak pahnih thum an duhmi a kan tuahtertu a si ahcun Satan rap i ifoih a si sual hnga.

Categories: Artical, Comedy

Leave a Reply