Lawm Tein Nun Ding

China ram 2020 ah a cang cuahmah lio Coronavirus ruangah atuni tiang a thi cangmi minung 811 an si. A zaw cuahmahmi tuni Feb. 09, 2020 tiangah 37198 an si. Khualtlawn zong tih a nung ngai. Minung kan nunnak hi caan a tawi tuk tikah i lawm tein nun thiam a herh. Kan thih taktak hnuah kan kong aa chinchiah huamtu an um hnga maw? Kan nun lio i khat le khat i caihphai ceu ruangahi nuam loin um, i sik, bia i chalh ceu in kan vawlei nun a liam ding cu a pam tuk. Ruakinn ah Bill timi pa nih biachim ka duh a ti. A thimi kha motor accident in a si. Bill cu a dir i, kei zong mahbantuk accident fak ka tong ko nain ka thi lo. Atu a thimi pa bantuk hin a rak tuar ve ding ka si nain ka luat. A thimi pa min cu hodah si cu, a ti (Danial Rodgers). Ruak cu kan i huam nain kan min kong hmanh i theih ti lo chan kan phan. Thihnak cu hopaoh nih kan ton ding a si caah kan nunchung i lunglawm tein nun zia thiam hi a biapi.

Minung si, Khrihfa Jesuh zumtu nihcun lunglawm tein khua kan sak khawh ding a si. Lawmnak cu Khrihfa asimi caah cun kan i chuahpimi nuhrinman a si. Khrihfa a simi paoh nih 1) lungfim tein i lawmh ding, 2) mi hmuh khawh ding in i lawmh ding 3), pehtlai tein i lawmh ding le 4) Mi chawnh khawnh ding in i lawmh ding. Hi ti i lawmh khawhnak ding ah vawlei le minung hawi nih an chuah pimi thil vialte kha Khrih dawtnak in tei khawh a hau ve ( Andrian Rogers). Thil dang cu chim loin aa duh cukmakmi mah le nupi va hmanh nih lungre an kan theihter khawh. Mirang pa a thi dengmi kha a fapa nih a thut pi. Meh rim hmui ngai a nam i a pa nih a fapa cu zei rim dah a si, a ti. A fa nih ka nu rawl a chum lio apple pie a tuah ko khih a ti. Si cun ka duh tukmi a si i va ka lak piak a ti. A fapa cu a hung kir i, ka pa ka nu nih na pa thih tik i mileng caah ka chumhmi a si, a ti (Danial Rodgers). Hi bantuk tiang hna a um khawh caah Khrih pekmi dawtnak ilawng in tei khawh i i lawmh khawh a hau. Cu lo ahcun vawlei nih hna hnawh pek cuahmah buin kan thi dih ko lai.

Thinlung lei retheihnak bawmtu pawl nih minung a si paoh nih an duh bikmi thil pathum a um an ti. Cu hna cu: 1) Midang nih duhmi, 2) herhmi, le 3) dawtmi si hna an si. Amah bel hi hna hi minung hawi sinin hmuh khawh dih ti a um bal lo. Kan Bible lawnglawng hi Pathian nih minung tling tein a kan dawtnak cakuat a si. Mithiang Paul nih zumhnak kong fak khun in a chim. James cauk nih tuannak kong fak khun in a chim. Peter nih biacaihnak kong fak khun in a chim. John nih kan herh bikmi dawtnak kong fiang bik in a chim ti ahcun kan palh lai lo (1 John 4: 7-21). Rawl chum piak, thil suk piak, inn thenh piak ko zong ah dawtnak a um lo ahcun tih a nug thiam. Inn lo cawk piak, mawtaw tha cawk piak, khual hna tlawn pi lengmang zong ah dawtnak a um lo ahcun lawmhnak a um lo. KHRIH nih kan sining tein a kan cohlan ban tukin khat le khat i cohlan tik ah lawmhnak a um. Andrian Rogers nihcun Pathian rian a si ko zong ah lunglawm tein tuan ti lonak hmun tuan cu ka huam lo a ti. Mi zei paoh philh te ding kan si dih. Nun chungah i daw hna usih law lunglawm tein nung hna usih.

Categories: Sermon

Leave a Reply