Value in life

Mi Dawh Sinak in Mi Duhnung Sinak Leiah (From Beauty to Hearty)

• By Chan Lian
• 8 July, 2013
• 2 Comments

Tutan kan North America CYO puaipi cu Laimi nungak muidawh le fashion zuamnak nih a nuampi ngaingai. Pahrang an i zuammi zongah  lam dawhdawh le tungtai thatha kan hmuh hna. Illinois in a voi khatnak kan i tel ve. Kammah UCCC bu chungin muidawh pahnihnak, pahrang pakhatnak, tlik ah pahnihnak hna an kan hmuh piak khawh ve. Ai zuam rih lomi mi dawhdawh, pahrang nei tampi kan um rih. Hi bantukin in lenglei zohnak in kan than cuahmah lioah chunglei in duh a nungmi zong kan si chih khawh kan herh.

Mi dawh timi le mi duhnung tiin van then usih. Mi dawh kan timi pawl cu an mui nih siseh, an thilthuam nih siseh, an  pumrua nih siseh  kan mit a nuamhter. Hei zohnak bak ahkhin mi an lomhter khawh hna. Anmah um in an um ko nain mi a tukforhmi ko khi an lo. Mi duhnung kan timi pawl cu an lenglei muisam, thilpuan, pumrua ah zoh siloin an chunglei dawhnak nih a ceutermi hna ruangah mi thinlung an lomhter khawh. Chunglei dawhnak kan timi cu zumhtlak an sinak, tetsa neihnak, tordornak le nawlngaihnak ai nunpi mi hna khi an si. Cu pa cu nu cu, duh a nung tuk e! kan ti tikah kan sawh duhmi cu an muisam ah siloin an lungput an i nun pimi tu kha a si deuh.

Mui dawh ngai, aw that ngai, thiammi tam ngai pinah duh a nung thiamthiam mi um khawh a si. Cuve bantukin i dawh ngai, thiam ngai ko nain chunglei ah tih a nungmi lungput he khua a sa, a thudirmi um khawh a si ve. Muisam le thiamnak ah hawi a lo nain chunglei lungput le biakamnak ah duh a nung ngaimi um a si. Cuve bantukin muisam in hoi lawh lo, thiamnak le ngeih lo piin ah lungput chia ai neih chapmi zong um khawh thiamthiam a si. A chunglei in duh nunnak a nei lomi paoh nih lenglei dawhnak hi kawl deuh a si tawn. Tamh huam tuk hei bantuk, thilpuan duh tuk hei ti pawl hna khi a si theu. Lenglei lawng ai dawh i chunglei duhnunnak a um lomi cu caan rau lo teah an zia a lang ve.  Mi sinah that ngai i mah chung sinah zia chiat ngai hei tibantuk. Cun an i dawhnak cu a ziam colh.  Kan i dawhnak, kan thiamnak hna hi Pathian sunparnak caah a si ah cun Bawipa ai lawm. Phawrhlawt ruan kainak i kan hman ahcun Satan ai lawm. Kan chunglei dawhnak siseh, kan lenglei dawhnak siseh, Bawipa duhning in hman i zuam hna usih. Caan sau an nguh lai.