Mi Va Soi Hlah

Bible bia vialte lakah “Mi va soi hlah!” timi hi zum lotu hna nih an duh bikmi a si (Jonathan McLeod). Asinain mi a soi ballo mi kan um hnga maw? Pathian riantuantu pakhat le bang nihcun kan bu nih lahkhah an ka pekmi cu an ka soimi he ai ci cang le rian tuan kan hau ti loh, a ti bal. Pathian cu a zum ko nain biakinn phak a duh ti lomi American minung 100 ah 72 nih  pulpit in mi soisel a tam tuk caah pumh kan huam lo an ti (USA Today Poll). Zapi nih hruaitu soi, hruaitu nih zapi soi, zatlang nun ah pakhat le pakhat i soisel hi Laimi Khrihfa ai timi kan nun ah a khah bakin a khat. Piangthar le thar lo i soi, khamh fiang le fiang lo i soi, a lam le lam lo i soi te pawl hi a nuam in kan theih chin lengmang. Vawlei cung bawlung chuih thiamcem Messi le Ronaldo hmanh an thiam lonak a sawi awk a thei pengmi kan si. Hi tikah Bawi Jesuh nih Mathai 7 ah “Mi va soi hlah!” a kan timi hi zeitindah kan i fian cio.

Mi nih an tuahmi thil cungah a tha, a tha lo ti cu kan caih khawh nain zeiruangah dah mah thil an tuah timi cu kan caih kho in sual kan phaw kho hna lo. Mi nih an chimmi cungah a hman, hman lo timi cu kan i caih khawh nain zeiruangahdah mah bia a chim timi cu kan i thlak kho in sual kan phaw kho lo (Keith Krell). Nangmah nih sualnak tiah na ruahmi kha midang pakhat nih a tuah tikah, zeinihdah a tuahter timi na hngal lo, ti duhnak khi a si. Minung cu kan ci le kan kor ruangah le kan thannak pawngkam nih an kam sersiamning cio ruangah kan tha der thawnnak ai dang cio. Kan tluk fawinak zong ai dang cio (Bible Gateway Commentary on Mt.7). Mi nih thil an tuah tik le bia an chim tikah an tuah duhnak, an chim duhnak an thinlung hi kan hngal thlu kho lo. Mi nih cun lenglei langhning kha an zoh, sihmanhsehlaw Bawipa nih cun lungthin kha a zoh (1 Sam. 16:7). Mah nu mah pa nih thinlung tha lo a neih bak ko ti zong kan va theih men hnga nain, kanmah sining i ruat ta ve locun mi dang kha ve soi sel hlah ti hi Jesuh chim duhmi a si. India phungtluk ah, na soi duhmi pa keden kha nai denh i meng khat tal na kal hlan lo cu va soi hlah ti a um.

Ning cang loin mi soisel a hmangmi sining phun hnih a um: 1) Keimah zong misual, mitlinglo ti ai thei lomi me depde (hypocrite) sinak le mi nak in ka tha deuh tiah ai ruatmi sinak, 2) Mi dang cungah dawtnak le vel pakhat hmanh a nei lomi sinak hna hna si (Jonathan McLeod). Ahohmanh nih, zeihmanh si set ṭung loin, pa ka si ve tiin aa ruah ahcun amah le amah aa hlen a si. Ka u le ka nau hna, pakhatkhat nih sualnak nan tuah sual tikah, a thlarau deuh pawl nih khan, lam dingah nan chiah ṭhan awk a si; cun cu ti nan tuah tikah nemnak tein nan tuah lai (Galati 6:1-3). Zumtu pakhat le pakhat kan palhnak kan i hmuh tikah i soisel lei siloin a nemnak tein kan remh awk a si. Bawipa caah mizeipaoh kan sunglawi dih caah mitfang he a kan tahchunh. Pakhat le pakhat kan i pehtlaih tikah kan mit kan bultawl bantukin i pehtlaih ding a kan cawnpiak. Kan mit hnawm kan i chuah piak tikah namtong le hreitlung kan hmang bal lo. A nembikmi thilpuan le a thiangbikmi ti hna kan hman. Cucaah Keith Krell nih cun, mi pakhat na soisel hna laiah na lungput kha Pathian hmaiah a dik le dik tha tein i check ta, a ti. Soiselnak aiah thla i campiak tu hi Bawipa nih a kan fialmi a si. Hihi ai fiang i a hal mi cu pek kan si lai, a kawl mi nih kan hmuh lai a kingmi cu kutka awnh kan si lai.

Categories: Sermon

Leave a Reply