Na Khrihfabu A Biapi Maw?

Zeibantuk Khrihfabu Member Dah Na Si?

Khrih zumtu, zultu ka si aa ti ve i zumtu nih tuah ding a tuah ballomi US Khrihfa hna kong kha Pathian mi hman pastor Ernest L. Easley nih hitihin a tail. Zumtu zakhat ah:
10 % cu hmuh khawh an si bal lo.
20 % cu biakinn zong an phan bal lo.
25 % cu thla an cam bal lo.
30 % cu Bible an rel bal lo.
40 % cu mission caah an tho bal lo.
75 % cu Khrihfabu caah caan pek ding an i tim bal lo.
95% cu Khrih sinah minung pakhat hmanh an rat pi bal hna lo.
100% tu nihcun Vancungkhua phak an duh dih.

Chap rihmi cu: kan khrihfabu member pawl zoh tikah ka lung a dong a ti tu pastor pa kong a si. Cu pa nih a chimmi cu: “ Ka church member pawl hi thal caan a linh a celh lomi le khuasik caan ah a kih a celh lomi lawngte an si.” ti a si. Mah manbantuh members a ngeimi US khrihfabu nih an tonmi a si ti cu cohlan ding a si. Laimi hi khrihfabu um hlahsehlaw zeikhi dah kan tuah hnga? Aho khi dah a kan tlangtla tu a si hnga? Kan fale hi zeitin kan kilkawi hna hnga? Chiatni thatni ah aho nih dah a kan ven hnga? Khrih nih a thisen in a cawkmi khrifabu hi kan caah a sunglawibik a si ko lo maw? Cu khrihfabu cu pastorate soiselnak, ingpuannak, kan zia chia chuahnak hna ah kan hmang sual maw ti hi ruah a hau ngai. Upa deuhkan caah cun kan khrihfabu dah ti lo cu khoika hmanh ah an kan theitu an um lo. Kan hmatpungtin (Identity Card) a thlau. Khrifabu lawngah aho kan si a kan theitu an um. Kan fale kan hruai khawhnak hmun a si. A ho nu a ho pa ti an kan theihnak hmun a si. Pathian bia in kan thannak le mission rian felfai tein kan tuannak hmun a si. Cu bantuk a biapi tukmi kan khrihfabu hi kan dawt tuk ding a si.

Kanmah bantuk mipem a si vemi Korea, Phillipine, Vietnam tbt hna zong nih US an phak hnu ah an khrihfabu a biapit zia an theih i an mifimmi hna zong nih ca tampi an tial. An tialmi tampi lakah thazang peknak zong aa tel, ruahnak cheuhnak zong aa tel i palhnak an rak tuahmi kong zong aa tel.
1. Thazang peknak: Asian pastor pawl cu thlahlawh zong a tlawm ko nain kan miphun dirhnak caah Pathian nih rian pekmi kan si. Atu i ka tuanmi nih kan fale, techin tiang thluachuah an hmu lai. Khrihfabu dah ti lo cun a dang kan cawl khawhnak a um lo caah toidornak le tuannak in kan nun cio a hau.
2. Khrihfabu members nih siloding kan simi ralrin peknak: Duhdanh ngeimi (the pickers), Huatmi ngeimi (kickers) le tleihchan khummi ngeinak (stickers).
3. Khrihfa nih mission rian: Khrih caah tetet tha sinak (Khrih na zumh ruangah na lawmhnak na phuan), Khrih caah riantuan peng duhnak (Mission), Zumtu hawi he khuasak ti le Pathian thangthat ti a sunglawi in a chiami sinak (Fellowship with others).
4. Kan khrihfabu hi Asian mi caah kan cozah a si. Nitin kan herhmi kan i bomhnak, kan holh tein Pathian bia kan i hrawmnak, nunphung kilkawinak, US hmuncia minung mi hna nih an kan theih i rian kan tuantinak a si (Sang Chun-Rah).

Tuanti hawile Khrihfabu hruaitu hna le pastors hna, nan tha chia hrimrhrim hlah uh. Kan tuanmi rian hi a phu tukmi, as sunglawi tukmi a si. John 12 ah Jesuh cu Lazaruas he thah ti ding in Judah hruaitu hnna nih an fuh ko hna. Jesuh taza cuai duh le Lazarus kha nung tak maw ti theih an duh caah an fuhmi hna a si. Pathian nih kan Bawi jesuh tu a cawisan than i minu nih a man fak tukmi zihmui a toih. Rian tha tuan ahcun dondaltu zong an um ko lai. Khat lei ah, an mahnak in thazang pe tu zumtu tha, khrihfabu Khrih nih a thisen in a cawkmi a rak tanhtu Pathian mifa an rak tampi ve. Lami le Khrifabu kan i then kho lo. Zumtu tha chinchin si i zuam cio hna usih.

Categories: Sermon

Leave a Reply