Na Si Vang Lengmang Ti Hlah!

A kih ah a lum duhmi minung, a linh ah a daih a duhmi minung nih ka duh mi cio kan hal tikah Pathian si hi a fawi hnga maw ti ka ruat tawn. Kum 11 ka si ah nazi Kawlphaisa 350 man ka rak duh. Mah ka ngeih ahcun ka lung hna ngam lai ka rak ti. Atu ahcun Tesla Cyber Truck rumro ka duh hoi cang. Minung hna a hnawh bik tu pakhat cu hmuh ciami thluachuah ah i lungsi lo le a hlei in duh mi ngeih zungzal hi a si (James Merritt). Dr. Dan Herman nih 1996 ah ”Fomo” timi biafang cu a suallam a fianter. Sining lo piin thil va duh, midang nih a ṭha deuh an ngeih tiin mi va hngar le keimah nakin nun nuam deuh an ngei tiin va hnahchuah nun khi a si tiah a rak chim. Midang nunnak taktak khi anmah dah ti lo nih va theih piak khawh a si lo. Tiva kam ah nga sa ai chumh i a ei cuahmah mi pa kha mirum tak pa nih ruahnak a cheuh. Nga hi na ei khawh zah lawng tlai hlah! Tam deuh in tlai law zuar a ti. Mipa nih, “Cun teh?” tiah a leh. Sur nai cawk lai i tam chinchin na tlaih khawh lai a hun ti. Mipa nih, “Cun teh?” tiah a hal chap. Nga tampi na zuar khawh in ngatlaihnak tinbaw nai cawk lai. Rianbawmtu na hlan hna lai i keimah bantuk mirum ah nai chuah lai, a hun ti. Mipa nih, “Cun teh?” tiah a ti ṭhan. Mirum pa nih, “Cun pei zeihmanh ruah ti lo, lungdaihngangam tein na um khawh lai cu,” a hun ti. Mipa nihcun, “Mah cu pei atu ka nun cu a si ko cu,” tiah a leh. Mirum pa cu a thih tiang vawlei thil ah a buai rih ko lai. ai lomh caan nakin a thinphan caan a tam deuh lai. Cun a thi ve ko lai.

Sifah sawmnak a si lo. Thathut fialnak zong a si lo. Nun zia thiamnak thawngtha a si (Filipi 4:13). Ṭuan ding ah fial kan si. Kawl ding ah hnek kan si. Chawkengtu ṭha nih a hmuh cia chaw a karhter ding a si fawn. Nain na duh mi paoh kan pek lai tiah biakamh mi kan si lo. Herh mi tu herh lio caan te ah pek ding in kamh mi kan si. Thih ngamh in Khrih a zultu hna zong nih rel cawk lo harnak an tuar caan a um. Mithiang Paul zong a hman lo ningin thong an thlak, a miphun hawi nih an huat, an hrem. Hmanseh, teinak an hmuhnak cu Pathian khuakhannak tang ah kan um ko ti an hngalh ruangah a si. Pathian khuakhannak ralchanh in khuaruahnak nih thinphannak le lunghnangam lonak a chuah pi. Zeicahtiah vawlei ahhin na duh lo ning in thil a cang lengmang ko lai. Christmas zing i arsa ei awk a ngei lomi nih ar ai thahmi chungkhar kong a ruah peng ahcun “Fomo” a si. A hmang lo ningin arsa a kawl kho. Thongkhat man a Lai puan zong arsa 200 man ah a zuar men ko lai. Thinphan le mihngar nun nih mah le mah tang ah a kan thumh. Pathian khuakhan a zummi nihcun arsa ei awk a ngeih lo lioah a ngeimi hna kong a ruat lo. Ei ding ah thahmi ar siloin arsa eikhotu minung ah a sertu Pathian, sualnak in nun thar petu Khrih Jesuh le ar a zua kho rihmi nun lam a hruaitu Thiang Thlarau Pathian cungah aa lawm. 

Na mawtaw cu na duhnak ah na mawngh khawh ko lai. Na kut, na ke le na lei zong na duhmi na tuahter khawh kho lai. Zeicatiah Pathian nih duhthimnak an pek caah a si. Hmanseh, nangmah na chungchuak na fale hmanh kha na duhnak ah na mawng kho hna lai lo. Zeizong te cungah nawlngeitu cu Pathian lawnglawng a si (Psalm 24). Pathian nih kan caah a rem a timi cu kan duhmi a si lo zong ah a rem a hau. A remh lo a timi zong a rem lo a hau. “Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang. Ṭhawnnak a ka petu Khrih thawngin thil zeipaoh ka tuah khawh ko hna,” (Filipi 4:12b-13). Na sikhawh tawkin na kawl, a za. Na herh zat an pek. A za. Na sikhawh tawk in na chungkhar na cawnpiak hna, a za. A tangmi cu Pathian kut ah ap cang. Lungdaihhnangamnak na co lai. Bia tha na chim lai. Khua tha na ruat lai. Nangmah nak sikho deuhmi hna nun ah Pathian thawnnak na hmuh lai. Nangmah nak tlacham deuh mi hna cungah zangfahnak na ngei lai. Nitin na nun ah phunzai ding nakin tette khan ding a karh lai. Bawipa nih a hnakkar ah an tenh zungzal lai.

CTL

Categories: Uncategorized

Leave a Reply