Nu le Va

A ruang tampi ruangah nu le va aa ṭhen cangmi kan si zong ah na tha chia hrim hlah. Kawlram ahcun ngakṭah fa khua awng an tong lo an rak ti tawn. Nitlak lei ram ahcun President hna ah an i chuah. Bochan awk an tlak tuk. Kan Khrihfabu zong ah an um. Nu le va aa um rih ko mi cu zei ruang hmanh ah i ṭhen hlah usih. A ruang: 1)Ngandamnak a si. Zakhat ah sawmnga le pariat chungkhar ngei lomi cu an chan a tawi deuh. 2) Rum deuhnak a si. January 20, 2006 ah kum 15 chung hlathlainak an tuahmi nih an hmuhmi cu nu le va budget pakhat i a kal mi cu an rum deuh hrim ti a si. 3) Fim deuhnak a si.

I duh sukmak ko zong ah midang he khuasak ti hi a fawi lo bik a si tiah pasal nusal mifim pipi hmanh nih an ti. Duhmi le zia aa khah lo tik ah khua ruah peng a hau. Cu caah single pawl zong nan tha chia hlah uh. Chungkhar ngeimi nih kan in hngar caan a um ko. Nan caan kha sahlawh le Khrihfabu caah tam deuh nan pek khawh.A va he ṭhen a duh tuk cangmi nu a um. Pathian a zummi a si caah Khrihfa fimchimtu sin ah a kal i bawmh a va hal. Mah saya pa nih cun, na lung sau. Cathiang nih pei na va cu na upat lai a ti kha a ti. Mi nu nih ka celh ti lo, ka lung dong cang a ti. Saya pa nih na innpa hmanh nangmah na dawt ban tuk in na dawt lai a ti ṭung, a ti ṭhan. Minu nih ka innpa hmanh ka dawt deuh khawh hna, a ti hoi. Saya pa nih Cathiang nih pei na ral hmanh na dawt lai a ti kha, tiin a hun chimh ṭhan. A ngai duh lo i fak lak in ṭhen ka duh, ruahnak ka cheu a ti. Saya pa nih na dawt bakmi cung i na tuah dingmi kha thla hnih chung va tuah piak law, cun ṭhen te a ti. Minu cu an inn in a lawi ti lo.

Nu le va i dawtnak ah a ṭha bikmi cu hmai kal lengmang i timh si lo. A hlan na ka dawt bantuk tein ka daw ṭhan timi kha zulh khawh a hau. Efesa Khrihfabu members nih Khrih zulh duh ah khuachia an biaknak thilri a tu dollars million 5 tluk an khangh. Kum sawmli a rauh ah Khrih cu an kal tak ṭhan. Cu caah, Biathlam 2:4-5 ah nan lung i thleng ulaw a hlan ban tuk khan ka daw ṭhan uh a ti. Chungkhar cio zong kan i nuamh cem lio kha kan tuah ṭhan khawh ko. Mah nupi, mah va kha dawt cem ding a si.

Categories: Artical

Leave a Reply