Pher le Zumtu Nun

Pher le Zumtu Nun Minung le pher kan i then kho lo. Pher cungah kan thu, kan to. Kan zau. Kan i lawng. Kan ni, kan khek. Kan ei kan ding. Zawt kan tuar. Kan mitthli kan thlak. A thih zong kan thi phah. Mark 2 chung i pher cungah aa lawng komi mizeng pa cu vawlei cungah a rum bik tiah an kawh theu. A ngeihmi chawva a tam ruangah si lo. A caah dawtnak taktak a ngeimi hawi tha pali a ngeih hna caah a si (Donald Cantrell). Dam seh ti an duhpiak tuk caah a ihnak a pher in an zawnh i inn cung in Jesuh sinah an hei thlak. Minung nih pher hmangin mizaw cu Khrih sin an phak pi. A pher um hlah sehlaw rak i lawnghnak a ngei lai lo. Zawnhnak zong a um lai lo. Khrihfabu hi mi zei paoh caah pher a si awk a si. Zumtu nun zong midang caah pher ministry a tuahmi nun a si awk a si.

Pher nihcun mi a thlei dang lo. Aho ca paoh ah aa phah. A hawile pali hna nih zeiruangahdah a zen timi ah an buai lo. A damnak ding tu ah fak piin an i zuam. Dawtnak nihcun harnak a tongmi hna cungah biacaih in an sual a kawl lo. Ngaihthiamnak le damnak an hmuh thannak ding tu ah aa zuam. Dawtnak lungthin tak he pakhat le pakhat i bawmh tikah Khrih dawtnak aa phuang ve. Harnak a tongmi he i ton tikah zumtu tampi nih thiam ciomi cu a ruang kawl piak i sualphawt le chimh hrim hi a si. Cucaah Howard Clinebell (June 3, 1922 – April 13, 2005) nih harnak a tongmi minung tampi nih changreu an kan hal i zumtu hawi tampi nih lung kan pek hna, tiah ca a rak tial i a tu tiang ro a ling. Khrih Jesuh zong nih zei tluk a sual mi minung hmanh va si ulaw nan fale nih changreu an i hal hna ahcun rul cu nan pe hna hnga maw, tiah a rak chimmi kha mi tampi dirhmun a si theu.

Nun hi pher bantuk in kan i phah sian lo ahcun ahonihdah a fuh ngam lai. Pher cu thahau bantukin mi a duah lo.Phah loin chiah sawh pengmi pher cu a buar, a rop. Ahohmanh nih an hlam bal lo. A rim a chia, zu le hngirlhte te pawl nih an tam, an vah hnawh men. Hmanmi pher cu thianh lengmang a si. A faifim. A tleu. Nifatin hlam lengmang a si. Aa phahnak te ah a um ko nain a herhmi paoh nih an fuh. Philh khawh a si lo. Dinhnak petu pher. I hrimhnak petu pher. Tha i damhnak pher. Thazang i khonnak pher. Mizeipaoh a cohlangtu pher. Khrih Jesuh cu mi vialte caah pher a si. Khrihfabu zong a si awk a si. Mi nun khamhtu hmun, ahopaoh nih fuh duhmi, fuh ngammi pher a si awk a si. Pher nih damter khawhnak a ngei lo. Sual phawtnak le sual ngaihthiam nak nawl zong a ngei lo. Dawtnak Khrih Jesuh sin phaktertu hriamnam tu a si.

Categories: Uncategorized

Leave a Reply