Rangtum Maw Laa Dah Na Thim Lai?

Rangtum maw na thim deuh lai laa (Donkey) kan ti hna sehlaw, laa a timi kan um lai lo dah. A luan ciami 1903 thok in a tu Hollywood movie an tuahnak ting ah rangtum hna hi a biapi taktak mi ah an cang. Cu bantuk movie thlaknak le mirum hna nih hawi sin langhsarnak i an hmanmi rangtum pakhat i a man hi dollar sing khat leng a si. Cu lio ah laa pakhat i a man cu dollar 500-2000 kar a si. Laa an hmannak hna hi a luan ciami kum 5000 khan a rak si cang. Laa cu inn zuat satil a si ve nain langhsarnak ah citmi siloin thil phurtu, leng dawktu ah an hmanmi an si. An tung hi zapi huap in lehmah 40 an sang. An hnakhaw a sau, an vang a tawi, an khual a nuar. Thlik zuamnak ah an hmang bal hna lo. Thil tu tam taktak in an phurhter hna i an pum hmanh a lang tawn lo. Cubantuk a simi laa cu kan Bawipa Jesuh Khrih nih zeiruangahdah aa thim hnga? (Mtt.21).

A thih lai nak zarh khat lawng aa duh cang. Jerusalem ah sunglawi taktak in lut ding a si. Mi tampi nih an ka don lai ti a hngalh. President Trump cu vanlawng in a kal lai. Kawlbawi pawl cu Land Cruiser in an kal lai. US mino pawl cu Lamborghini ($ 450,000) in an kal lai. Kan Bawipa chan lio ah rangleng rangtum paruk hrawng nih dawhmi i thim khawh a si ve. Sinain Laa fate aa thim. A ruang pathum a um:

1) BC 513 ah rak tial cangmi Zechariah 9:9 chung Pathian bia tlintarnak ding caah a si. Rangtum cu vawlei siangpahrang le raltuknak muisam a keng. Laa cu lotlo pawl le pawcawmnak caah tlaici theitlai a let a thalmi mipi hna muisam a keng. Khrih cu mipi caah ka ra ti langthernak a si.

2) Bible chan lioah rangtum cit cu raltuknak khi a sawh duh. Ral tei i sunglawi ngaiin hungkir khi a sawh duh. Laa nihcun daihnak (Peace) kha a langhter. Mi thisen chuah awk ah siloin in mi nunnak khamh awk ah ka ra tinak a si. A sangbik van ahkhin Pathian cu thangthat sisehlaw a dawtmi hna umnak vawlei ah daihnak um ko seh, timi kha a hun tlinter (Luke 2:14).

3) Laa aa citmi nih “Rianh ding ah siloin, rianh awk ah ka ra,” tinak a langhter (Mtt. 20:28). Judah nunphung ah “The Messiah’s Donkey” timi biafang an ngei. Cu i a suallam cu midang caah kuthnawm rian va tuan piak tinak a si. Khrih cu kanmah caah a thi ding a sinak a langhter.

Mipi hna nih “Hosanna” tiah an au. A suallam taktak cu ‘Kan khamh tuah’ ti a si. Rome uknak tang ah sifah, thinphan thlalau in khua a saami mipi an si. Atu kanmah Covid-19 tang i khua kan sak bantuk a si. Bawipa cu kanmah caah, daihnak pek duh ah, kanmah khamh awk ah a ra lio. Kan khamh tuah tiah au ve hna usih! (Isaih 62:11).

Chirhchan: https://amazingbibletimeline.com/blog/why-did-christ-ride-a-donkey-on-his-triumphant-entry/; https://www.baylor.edu/content/services/document.php/193175.pdf.

Chan Thawng Lian

Categories: Sermon

Leave a Reply