Ruahchannak Pakhat Lawng A Tang: Revival

Vawlei cungah ram thawngbik kan timi US ram cu “The Sick Nation” a zawmi miphun tiah an i au cang. Kum 1960 hnu in an ram ah sual pical alet 560 a karh. Nule pa fiangfai huaha lo fale alet 400 an hrin hna. Zakhat ah 80 nuva an i then. Vawlei cung wiskey vialte lak ah 85% hi US mi nih an din. High School siahngakchia an mark hi a tlangpi in 75 point a tum. Drugs, ithahdahnak le i tlaihremnak in a khat. American i a ral nganbik hi Iraq, Iran, North Korea, Cuba, Russia an si lo, kanmah le kanmah kan si. Lenglei nih an kan hrawk lo kanmah le kanmah kan i hrawk cuahmah (James Merrit). US ram cah ruahchannak pakhat lawng lawng a um. Cucu cozah tha a si lo. Dollar a si lo. Ral hriamnan le ral kap an si lo. Revival lawnglawng kan herhbikmi a si tihi US pastor tampi nih an aupi mi a si.

Revival timi biafang cu Latin holh Re-Vivo in a ra mi a si i nun than tinak a si. Phundang in chim ahcun revival timi cu Pathian nawl zulh kha a thar in vun thok than tinak a si. Cucaah American i Pathian rian  a tuanmi paoh cu revival pastors kan si i revival thawngtha kan chim awk a si (Charles Finney). Revival a mi herhmi hna cu zumlotu an si lo, hlawhhlang pawl an si lo, nauphiattu pawl an si lo, zu zuar pawl an si lo. A tha a thumi, a biatak lomi khrihfabu le khrihfa hna kan si (James Merrit). US khrihfabu hna cu an ke cungah an dirbu in an thi cuahmah. A ruang cu kupbil in an nun lo caah a si (Leonard Ravenhill). America minung hna nih vawlei thilri an thanchonak kha Thlarau leiah an mer lo ahcun sau a nung kho ti lai lo (Woodrow Wilson). American khrihfa sinah revival a tlak khawh thannak ding ah an i uahnak le an i seihchiahnak vialte an thumh dih a hau tihi an pastorte zumhnak a si.

Miphun ah siseh, pumpak ah siseh revival a tlun than khawhnak ding ah mah le ma hi thum i Pathian vel cah fak piin thlacam hi a herhbikmi a si. Ka min in kawhmi ka mi hna nih khan an lung an ṭhumh i thla an cam i ka hmai kha an kawl i an lam ṭhalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai (2 Chanrelnak 7:14). Khuaza vanram deng i a ummi Laimi zumtu vialte hna nih revival kan herh ve. Pathian nawl zulh i thok than kan herh. Rian tha kan tuan i sui in sak khualipi ah khua kan sak zong ah kan fale nih Pathian thatnak, dinnak le velneihnak lam i an than, an cawn lo ahcun pakpalawng a si. Kan sung colh (William Bennett). Nu le pa nih Pathian sinah kan kan hrimhthan i Bawipa nih kan thlacamnak a kan leh ahcun kan miphun a dam lai. Kan fale cu an rum la i an lian lai (Psalm 112). Revival nih a phakmi khrifabu le khrihfa hna cu Bawipa sinah thawhlawm pek duhnak an nei, an caan kha Bawipa caah pek duhnak an nei. An pahrang kha Pathian ram kauhnak caah hman chin lengmang an duh. An duhnak kha Bawipa nih a tlinter fawn (Mtt.6). Hihi Laimi kan caah thawngtha a si.

Categories: Sermon

Leave a Reply