Rumnak Lam Taktak Ka Hngalh Cang (The Right Path to Wealth)

Rich

A rian ka tuanpiakmi Bawi Jesuh hi mi sifak tiah a ruat i sifahnak lam i thim in a hnu a zulmi an tampi. Bia ngaite kan chim ahcun kan Bawipa Jesuh cu zeitik hmanh ah a kut  a tawi bal lo. Minung nih a chawva an ken cawk lo caah ti chungah a ummi nga te hmanh nih a rak ken piak ve (Mtt 17:27). Minung sinak in a rum kho ding ah kai ruat hrim lo. Sihmanhsehlaw, zeizong neitu Pathian thawng in kan rum ve hrimhrim lai tiah ka zumh. Cu zumhnak cu zei dang thil vial te nakin Pathian kha pakhatnak ah chiahnak in ka langhter lai. Pathian a pakhatnak ah ka chiahnak cu ka chawva amah caah ka sian le sianlonak nih a langhter bik. Zumhnak kan timi cu kut i tongh khawh le pedan in tah khawhmi a si lo. Minung kan thinlung cu a zir tukmi a si caah hngalh a har. Kan chawva kan hmannak nih kan zumhnak le kan lungthin a langter bik. Na chaw a umnak ah na lungthin a um ve lai (Mtt. 6:21).

Zeitindah keimah leiba hi vialte le ka bill hi vialte lakah Bawipa chawcu ka pek khawh lai, tiin ka hram tawn. Cheuhracheukhat pek ding ka lahkhah nih a zat lo tiin ka tlokciar. Cu “Keimah ca” timi thinlung ka rak neih ruangah hiti ka sifaknak a si timi cu atu ceu ah ka fiang. Phaisa hmuh ding ka duhmi zat kha ka hmuh khawh hlan in a cheuhra cheukhat kai pekcia cang lai. Leiba sal in a ka chuahkhotu taktak cu Pathian sin i pekchanhnak ka tuahmi thawng lawnglawng in a si. Cheuhra ah cheukhat pek i a tangmi cheu sawmkua nih a zat tawk in nun i timh kha thluachuahnak lam a si. Hmuhmi dihlak hman ko tung i i zat bal lo cu leiba sal sinak lam a si. Sikho sehlaw cu, cheu 100 ah cheu 90 hi Pathian pek i a tangmi cheu 10 te nih ka herhmi vialte a zat dih caan khi hei phak ka va duh dah!

Khrih Jesuh kan zumhnak ahkhan rumnak le sifahnak cu ai rak bunh diammi a si. A thiri ah siloin lungput ah khan rum ding le rum lo ding cu Pathian nih a rak chiah. Ka ral Satan nih Pathian rumnak ai fir i kan cheuhbauh tawn vemi rumnak cu chikkhat ca lawng a si pinah minung a kan hrawk tu men ah an cang. Cu tluk i a sunglawi lomi rumnak cu vok le ar nih sa thu an i cuh bang kan i cuh len awk a si lo. Rumnak taktak nih cun Pathian, mah lemah le minung hawi caah thinlung taksa thlarau lomhnak a chuahter. Cu rumnak cu neihmi a tlawm tam ah siloin kan lung nih hman a duhning cung tuin ai thok. 1984 i a rak tialmi a cauk ah Saya Jack Hartman nih, “US ram a lianhngan cu US minung cheu thum ah cheu hnih nih Pathian nawlbia ningin pekchanhnak kan tuah. US cozah nih nihinni tiang biaknak phaisa chungin tax a la bal lo,” a ti. Kan Pathian cu kan chawva lawnglawng in kan hneksak khawh (Mal. 3:10). Rumnak lam taktak ka hmuh cang!

Categories: Theological paper

Leave a Reply