Satan Ral Dohnak Hriamnam Thabik

Tuahsernak ruangah khamh kan si lo. Khrih nih an kan thlanhnak kan cohlan nak thawngin khamh kan si. Cu khamhnak cu a thlau kho ti lo. Zungzal ca in a kan tuahpiak cang. Amah bel tuahsernak in kan kil kawi lo ahcun kanmah tu hi khamhnak chungin kan chuak than kho. Vawlei i titsa in kan nun lio ahcun kan ral sehtan hi kan doh ve a hau. Amah nih a kan thluk hlan ah kanmah nih i doh cia a hau. Sehtan ral dohnak ah a thabikmi cu Pathian riantuan a si. Mah si khawh tawk in Pathian rian nitin kan tuan ahcun kan ral Sehtan kan tei i khamhnak chungah kan i khumh zungzal.

Munung a simi paoh nih kanmah le kan sining te cion Pathian rian kan tuan ding hi Pathian nih a kan duhpiak bikmi a si. Kan pum ai dan bantuk in pahrang kan neihmi zong ai dang. Cu caah a tanglei lam phunruk lak ah phun khat cio tal in Bawipa rian tuan hi khamhnak hmuhnak a si.

1)   Cawnpiak: Kan pawng a ummi minung pakhat khat nih thil dawh cah lo tuk a tuah cuahmah ahcun hmaitonh tein chimh hrin  khi a si. Kan chimhrin tikah nangmah nak in ka tha deuh timi lungput si loin siahernak lung put he dengteo tein va chimh khi a si.

2)   Fimchimh: Hruh ruang le khuahmuh khawh lo ruangah a lung a cawmi le lam hman lo ai thim lengmangmi hna pawl kha thil sining fiang lak in va chimh, lam va hmuh sak khi a si. A hruttuk timi lung put he siloin lungsau thin fual buin na fimthiamnak midang ca i van hman khi a si.

3)   Tha pek: Harnak le ngaih chiatnak a tong liomi hna kha nangmah nunnak tette khannak in va hnemh khi a si. Nangmah na har ve lio ah Bawipa nih an domhtlaihnak kong kha tette na khan. Mah thahnak kong chim cu tette khan a si lo caah Bawipa na cung i a thahnak chimtu hi a si.

4)   Hawi komh: Zapi sinah ai cawh ngam lomi le mi thar deuh pawl hna kha hawi ah va ser khi a si. Rawlhrawn sawmnak in maw, lente celh pinak in maw zapi sinah a i tel kho lo, ai tel ngam lo pawh va komh va pehtlaih khi a si. Jesuh a zum rih lomi hna zong komh khawh i zuam khi a si.

5)   Hawi sawm: Zapi nih tuahmi program ah kan hawile an tel dih khawhnak dingah hawi va sawm chih peng khi a si. Sawm khawh lo tikah thinhung lo tein mi kan sawm than hna ahcun sawm khawnh lo timi a um lo. Mi sawm mi thlah mi don hi Bawipa riantuan a si.

6)   Mi bawmh: Mi nih bawmh kan herhnak tampi lengluang lak ahhin mi kan bawmh khawhmi a rak um zungzal ve. Thangthat le lomhsaih duh ah siloin Bawipa rian a si tiah mi bawmh i zuam zungzal khi a si. Mi harsa cungah siaherhna ngaih khi a si.

Bawi khrih ah hawi dawt hna, nusal pasal kan sinak cu Bawipa rian ah lang seh. A lam pakhat tal in Bawipa rian kan tuan lo ahcun khamhnak chung in kan chuak. Khrih nih a kan dawt lo bia siloin kanmah nih kan lak duh lo he ai khat. Kan zei paoh hi thlan ah a liam ding a si dih. Bawipa rian kan tuanmi tu hi a rung hmun ding a si.

(Rev. Lal Cung Awi Cawnpiak nak in kai lakmi, UCCC, 2013) Click for image: fighting

Categories: Theological paper

Leave a Reply