Storm and Life (Thlichia le Nunnak)

storm

Khuasihnak lei ah a ummi hna nih kan i ngaih tukmi thalcaan cu a hung dih ruangmang. Tlawmpal ah hringdildel in a enmi thinghnah vialte an til dih lai. Vurdap rang hna an hung thla lai i hramhring hna an hung car dih lai. Khuaticaan ai theln bantukin minung kan nunnak zong nitin ai thleng ve. Zinglei niceu dawh te kan hmuh bantukin thlichia le tilet hna zong nih kan vawlei hi a den. Cu vebang kan nun hi lungretheihnak le tihnak le fahnak a phunphun nih a den ve. Paul le a dang minung 275 hna zong kha ni hleinga chung htlichia nih rili cungah a den hna (Lam. 27) . Cu lio an nun a chanhtu hna cu Paul nih a neihmi zumhnak le ruahchannak te kha a rak si. Minung lung nih a phanh tilomi, a sung a pek cangmi dirhmun i kan um ko lio zongah Pathian thawnnak i bochan ngam hi nunnak a rak si.

Kan nun hi thlichia nih a den cuahmahmi tilawng chung um bantuk a si. Kan himnak tilawng khamhnak dingah kan tlaihchan tukmi  vawlei thirli, chawva hna kha hlawnh an herh tawn. Chawva, thilri a tlaihchan tukmi nih cun an chawva kha thihnak rili chung tiang an zulh, an zuanh. Cun micheu nihcun keimah ka him ah a za timi lungput he tilawng ngan cun vokuanglawng in zam diam an i tim ve. Tilawng nganpi hmanh nih a celh lomi thlichia nih cun vokkuanglawng cu fawi chinchin in a hrawh ti kha an hngal lo. Paul nih cun hmun khat teah kan um lai, lungdong lo le thachia loin kan um lai. Cu lawnglawng ah kan him lai, a ti hna. Vawlei kan nunnak ah thlichia phun kip nih a kan den ko. Cu lio ah kan ral nganbik cu lungdongh hman hi a si. Lungdongh cu mah sining lawng i zoh i Pathian zumh lo a si.

Kan thi lai maw kan nung lai dah, tiin lungre thaih lioah kan ral zeitin ka tei khawh lai, thilri tam deuh zeitin kai thuh khawh lai tiin khua a rak ruat vemi zong an um ve. Raltuk lio ah ral pawl kap loin mah nih huatmi mahlei ralkap kah a hmangmi tampi an um. Har lio caan, buai lio caan ah midang diriam tein thut ai rak i timmi zong kan um tawn. Tinbaw ai leh tik mi chanh ding bantukin ti ah a kal i a hung mangmi paoh sobul in an tuk tawn hna. A ruang cu an thilri an duh ruang ah le an dirhmun an duh ruangah a si. Paul nihcun kan dihlak in kan him ti hna lai. Rawl kan ei dih tu a herh, a ti hna. Tiva kam an phak in kan lawng ai tak tikah an zapi in varal tiang an i lio kho dih. A ruang cu har lio caan ah pakhat le pakhat i si i thia lo tein an um, rawl kha an si khawh chung in an i hne. An thazang a um pinah an i bawm. Pathian mibu kan sinak kan herh bikmi cu i dawtnak, zumhnak le ruahchannak hna a si.

Categories: Ministry

Leave a Reply