Thanksgiving and Thanksliving

October 3, 1863 in Abraham Lincoln nih United states dih lak zulh ding ah a rak thok. President Lincoln nih sal luatnak a tuah tikah ramchung ral nganpi a rak tho. Cu ral ahcun cozah lawng siloin biaknak minung zong fakpiin an rak i tel hna. Cu ral cu cozah nih a tei dih tik US ram pi a dih lak in an i fonh i a daimi ram ah a hung cang. Cu thok cun tanksgiving cu US ram States dihlak ah tuah a si. December 26, 1941 ni ah President Roosevelt nih November zarh linak nilini paoh cu Thanksgiving ni zungkhar si dingin US ram cozah phung ah  min a rak thut.

Thanksgiving cu biaknak lei in Pathian sinah lawmnak an chim ni a si i mi bu tampi nih tuan piin an rak tuah pah leng mang mi a si. December 4, 1619 ah  Enland ram in US ram Virgin State ah Mirang mipem 38 an rak phan.  Mah hna hi biaknak hremnak ruangah Holland ah a zam i cu ka cun US ah a rak pemmi an si. Cun hna nih khua an tlak i cozah an ser. An governer cu William Bradford a si. Lam ah minung tampi an thi i cu lakah Bradford nupi zong ai tel. Bradford nih 1623 ah minphun piin tuahmi Pathian sin lunglomh bia chim ni a um lai tiah a rak thanh hmasabik . Cu hnu zongah mi pem pawl cu US ram hmun kip ah an hung phan cio hna. Cu mi pem hna nih US ram an rat hnawhchannak cu Luat Tein Pathian Biak an duh caah a rak si. A ruang cu England ram ah biaknak hremnak a um caah a rak si. US ram an phak tikah anmah tein Pathian an bia kho, an i uk kho cang caah Pathian cu kum tin an lawmh. Ni khat long hmanh si loin ni thum a lawm na, zarh khat a lawm na, an rak si.

November zarhlinak nilini  cu US ram ummi kan dih lak nih Pathian sinah kan i lomhni a si lai. Mirang pawl cu vuiar sa, wine thawthaw le rawl thawthaw an chum hna lai i hawikom pawl he Pathian an lawm hna lai. Micheu nih an nunnak ah Pathian a thahnak vial te kha an ruat lai. Mi tampi nih midang cungah lomhnak an chim lai i, upatnak an pek hna lai. Mi cheu cu Pathian kong ruat hleng loin an ngeihchiah le chawva an i langhsar caan a si ve. An mawtaw an chuah bal lomi an chuah lai. An inn lo kha mi hmu hna seh tiah mi leng an sawm hna. An hrai le an kheng thatha an chuah lai.Thanksgiving si ti loin Wealth-showing (Rumnak cawngia) ah a cang tawn. Laimi nih US ram thanksgiving hi a hrawm zia thiam ve awk a si. Bawipa nih a duhmi thanks giving cu thanksliving, lunglawm thatho tein nun khi a si. Vawlei hi vawlei mit in na zoh ahcun na lung a dong lai na nun a thling a za peng ko lai. Bawipa nih zeitluk in a kan zohkhenh, a kan kilkawi le  a kan siaherh ti na ruah ahcun na hmailei zong Bawipa kut ah na chanh khawh lai i na tha a nuam peng ko lai. 

Categories: Sermon

Leave a Reply