The Blind Mind (Thinlung Mitcawt)

Kutke tlam tlin ko, ngan zong dam ko buah lamkam rawl hal lakin a kan umter khotu cu thinlung mitcawtnak a si. Lai holh in thinlung, nunlung, fimlung kan timi hna nih a sawhmi cu kan chung thlarau khi a si. Cu kan chung thlarau mit a cawt tikah a dam komi kan taksa hi khoi ah ka kal lai ti a thei lo. Lungthawhnak zong a nei kho lo. Ruahchannak zong a nei kho lo. Khua zong a ruat kho ti lo. Cu ti kan um tikah a cheu cu tuan hmun kan tuan, ei hmun kan ei kan nung sawhsawh. A cheu cu kan nun a tumchuk i lam kam ah rawl a halmi tiang tampi kan um.

Jerekoh lam kam i thinlung mitcaw pa zong mi rawl hal in a rak thu ve. Hi ti lamkam i rawl hal in a umnak hi kum sarih hrawng si cang dawh a si. Mi nih siseh amah le amah nih siseh minung cazin ah khumh ti lomi Bartemu a si. Amah hi tlangval no a si ko nain  a nu le a pa nih thathi i zoh lomi a si caah thazang petu nei huaha lo, mi nih namhneh deuhmi dirhmun  in a rak thang. Caan a sau tikah a pur ruangmang ve i rawl hal hin ka nun dih ko cang seh tiin lam kam ah a thumi a si. Zeithil a theihmi hmanh nih a lung a turcawlter kho ti lo. Bawi Jesuh kong a theih hnu lawnglawng ah zumhnak le ruahchannak pel pawi te a van nei. Jesuh a ton taktak tikah halvak dirhmun in Jesuh zultu dirhmun ah ai thleng. A thinlung mit a ceu than.

Minung caah cun a si kho lo nan timi zong kha Pathian caahcun a si kho, tiah Juseh nih a zultu pawl a ti hna (Mark 10:17). Minung le minung cu kan lung kan i dong, kan i soi kan i sel, kan i don kan i khan. Thinlung mitcawtnak a zualtertu ah kan cang lengmang. Bartemu nih Jesuh a auh lio ahkhan a minung hawi nihcun, “Au hlah, dai tein um,” an ti. Cu lio caan teah a thinlung mit a caw deuhmi cu Bartemu siloin a khamtu mipi kha an si. Jesuh nih, zeidah na duh tiah a van hal. A hlan ka sining bantuk sithan ka duh, tiah a leh. A kan sertu kan Pathian nih a kan serthan khawh. A kan remh than khawh. Kan thinlung mit a auter than khawh.

Categories: Theological paper

Leave a Reply