Thlacamnak 2

Ka hawinu pakhat nih Kawlram kan um lioah, Pathian ziah hi tluk sifakmi dirhmun in kan khua i na ka chuahter nakin America uico zong na ka siter ko lo, tiah ka rak chim bal a ti. A taktak ah atu US kan phan i kan nun hi ka zoh tikah America uico bak ahkhan Pathian nih a ka chiah taktak a ti. Vanram he kan rak tahchunhmi US ram zong hi Pathian tel lo ahcun secodn hell a si tiah Korea ka hawi nu kum 25 a um cangmi nih a chim. George Carlin nih “Paradox of Our Time” ah US ram ngaihchia a sinak kong a tialmi hi zoh ve hmanh:

  1. Inn sang pipi kan sak cuahmah lioah kan thin a tawi chin. Lam kau pipi kan cawh lioah kan khua hmuhnak a bi chin.
  2. Kan neihmi nakin kan hman mi a tam deuh. Kan cawkmi thil a tam nain kan i lomhpimi a tlawm.
  3. Inn ngan pipi kan nei nain kan chungkhar kan zawr. Siarem tukmi inn kan nei nain a chung umnak caan tlawm tuk lawng kan nei.
  4. Fimthiamnak in kan sang nain problem tam deuh kan nei. Siai tampi kan nei nain damnak a tlawm.
  5. Tamtuk kan din, tam tuk kan zuk, tam tuk kan hloh nain tlawmte lawng kan ni. Kan thin tu fak tukin a hang, rang tuk in mawtaw kan mawngh, tlai tuk ah kan it, thaba tukin kan tho, tlawmte kan rel, tampi TV kan zoh, thlacam kan philh.
  6. Kan neihmi thil a karh nain kan minung man a tum.
  7. Kan holh tuk lehpek nain mi kan daw lo, mi tu kan hua hna.
  8. Nunnak caah riantuan cu kan thiam nain kan nun man zei si kan thei ti lo.
  9. Thlapa cung tiang kan kai kho nain kan innpa he kan i thei lo.
  10. Thil ngan deuhdeuh kan tuah nain thil tha deuh an si bal lo.
  11. Thli cu kan thian ter nain kan thlarau a hnawm.
  12. Computer, cell phone vialte hi thawngpang i thanhnak caah kan tuah nain kan pehtlaihnak a zawr chinchin.

Goerge Carlin chimmi bia hna kan rel tikah US ram um hi lung a dong kho men. Khat leiah phungchim thiam Steve Shepherd nih US ram hi vawlei cungah ram vialte lakah a thabikmi ram a si rih ko a ti ve. A chung ummi minung hna tu nih Pathian kan theih i thla kan cam a herh a ti. US ram thlua a rak chuah tu cu Pathian a si i atu zong ah a remh than kho tu cu Pathian lawng lawng a si. Kanmah pumpak thlua a kan chuahtu zong Pathian lawnglawng a si hmailei tiang a kan himter khotu zong a mah lawng lawng a si. Amah duhning in kan hal ahcun, kan halmi paoh kha a kan pek hrimhrim lai ti kan zumh caah Pathian cu ṭihnak zeihmanh um loin kan fuh ngam; cun kan halmi kha a kan theihpiak ti kan hngalh ahcun kan halmi kha a kan pek ko cang ti zong kha kan hngalh fawn (1 John 5:14-15). Thla a camtu kanmah ruangah siloin kan cam hnawhmi Pathian cu zeizong te a tuah khotu a si hi philh hrimhrim hlah usih.

Categories: Sermon

Leave a Reply