Value in life

Three Principles of Christian Mission (Thumkomh Mission)

• By Chan Lian
• 17 February, 2013
• No Comments

1) A tlaumi kawl le hngah: phaisa tlau cu ka tlau ti hmanh ai theih lo caah kawl hrimhrim i hmuh hrimhrim a hau. Pathian a um ko ti a thei rih lomi hna cu a thei ciami zumtu hna nih thawngtha kan va chimh hrimhrim hna a herh. Tuu tlau cu ka tlau ti ai theih, a tih tuk ko nain a kir kho ti lo. Kan bu chungah sual phu hrung ngai in mi hmai a khap lomi hna kan um ahcun kan i kawl i kan i cohlan hna a hau. Fapa tlau cu ka tlau ti ai hngalh i a pa sinah amah tein a kir than. Kan bu chungah a tlau cuahmahmi kan hmuh hna tikah lung dongh awk a si lo. Va zuan hnawh i va sik zong a herh lo caan a um. An rak kir than te ding ruahchan in thla camnak le dawtnak he tuin kan hngah hna ding a si. Minung cu mah tein ai thleng khomi kan si ve. Kawl a herh bantukin hngah zong hi mission rian tuan a si ve.

2) Mi harsa bomh: kan pawngah rawl tammi an paw a khim lomi le, mizaw thongtlami kan zohhna lo le, umnak nei lomi tluninn kan awnh hna lo ahcun, rawl ulh in thla kan cammi hmanh khi Pathian hmaiah fihnung a si. Tuu le meheh then awk ah Jesuh a hung tum tikah, mi harsa cung i cite le ceunak kan sinak a langhter bal ve lomi hna kan si ahcun zei tluk in ka piangthar thla ka cam kan i ti ko zong ah meheh lei ah kal ding kan si. Kanmah nih Pathian kan hngalh a herh bantuk tein Pathian nih hngalhmi si hi a bia pi hringhran. Ka pa ka pa tiah Pathian min cu a chal lengmang ko nain Pathian duhnak kawl le tuah ai zuam lomi hna cu Bawipa nih kan hngal lo a kan ti lai. Cu caah kan innpa dawt hi mission rian tuan a si. Na inn pa cu bomh a herhmi minung kha an si.

3) Kanmah le kanmah i dawt: kan hnu teah phungki pa pakhat Taxes ah ai thial i minung zahnih tluk nih an zulh. Cu bantuk cu US ah a um kho bal ti lomi a si caah an lau dih. Bawi Jesuh nih, keimah kan dawt hna bantukin pakhat le pakhat i dawt ulaw, an hmu tu hna nih keimah a ka zumtu nan si kha an hngalh lai, a ti. Kal i chim a herh bantuk tein nunnak in Jesuh dawtnak langhter hi a biapi tuk ve. Laimi mi tlawm te kan si i hi tluk in bu then le i huatnak he kan khah lioah missionary hna kan va tlah lengmangmi hi ruah a herh ngai. Kanmah le kanmah hi i rem hmasa usih. I daw in i ngai thiam hmasa hna usih. Mi nih kan zoh hmasa hna seh. Mah khrihfabu cu an i daw tiah mi nih hmuhmi kan si tikah khin kan Pathian ai lawm.