Tihnak le Thinphannak

Tihnak cu kan thluak in ai sem i kan thinlung nih a zumh ahcun thinphannak ah ai cang .  Kan vun, kan mit, kan hnakhaw, kan lei le kan hnar hna nih a tawngh a theihmi thil paohpaoh hi kan thluak ah an kuat. Zethil kan tonmi paoh hi kan thluak nih tih awk an si le si lo a tuaktan. Zapi kan thluak cu cu tuaktan loin kan lung zei paoh a kuat colh. Thluak nih tih awk a si tiah ah ruah tawnmi hna cu: 1) Thihnak a kan phakter khotu thil paohpaoh, 2) Kan pum tengnge a khawngden khotu hna, 3) Sunghzatlaknak a kan phakter khotu, 4) Kan dawtmi hna he a kan then khotu, 5) Kan ning a kan zahter khotu thil hna an si. Hi thil hna hi kan nun nih a ton tikah kan thluak nih ruahnak phunhnih a kan cheuh: zam tak awk a si mi le pahchih awk a si mi. Tih ding kan hngalh khawh le tihnak kan neihmi hna cu kan nun kan humhaknak ding caah ralrin petu an si. Kan himnak caah a herhmi timhtuahnak a kan ngeihtertu an si. Tihmi zeihmanh neih lo cu hruh a si. Hawi thluak canh lo, Pathian pekmi thluak hman zia thiam lo khi a si hnga.

Thianphannak kan timi cu a si tak rih loin nain a si sual lai timi khuaruahnak a si. Kan tihmi thil hna kan cungah a tlung hrimhrim te ko lai tiin lungre rak i theih cia khi a si. A si tak rih lomi cungah kan lungre a theih tikah a silo ningin i khamhnak kan rak i kawl cia ve. A cheu cu mi hrial le i thuhnawh in kan i la. A cheu cu i hranter phun, i puarthauter phun in kan i la. Hakkauhnak, nahchuahnak, thinhannak hna zong hi kan nun humhak caah mah khamh duhnak nih a chuahter mi an si. Cucaah hmailei kong i thinphannak cu Satan i a hriamnam tha a si tawn. Kan tihmi thil kan cungah ah a tlung te sual lai tiin thinphannak kan neihmi nih khualsual a kan purhter. A cheu cu hmunhma le cabuai kan i cuh. That kan i cuh. A cheu cu kan lung a dong, kan thin a phang i lungthin zawtnak nih pum tlamtlinglo ah a kan chiah. Cu caah President Roosevelt nih, “Thinphannak lawnglawng hi kan tih ding a si,” tiah bia roling a rak chim. Kan thinphanmi 100 ah 90 cu an cang tak bal lo. Ka ruah bal lomi tu nih a kan tlunh tawn si lo maw?

Nu le pa nih fale caah rovuih kan duhmi hna cu chawva zong a si kho, fimnak zong a si kho. Bawi Jesuh nih a zultu hna sinah a chiah tami hna cu, “Daihnak” a si. Thaizing kongah lungdai hngangam tein um i nihin kan nun nih Bawipa duhnak kawl  hi hmailei kan himnak caah lam thabik a si. “Na thin phang hlah” timi biafang hi voi 366 kan Bible ah ai tial an ti (Lloyd Ogilvie). A cheu nih voi 365 ai tial an ti. Chim duhnak cu hihi a si. Pathian nih amah a zumtu hna cu, “Thaizing kong ah na thin phang hlah” tiah nifatin a kan ti zungzal tinak a si (Mtt. 6:25-33). A sirih lomi cungah lungrethei le thinphang in um peng cu Pathian i bochan lo a si. Thi a kai, lungzawtnak a chuak. Taksa a rocar. Thlarau a thi. Ka thin phan tikah Bawipa ka kawl i amah nih a kan chanh (Psalm 34:4). Bawipa sin i kan nun kan ap tikah kan him. Kanmah nih kan uk khawh ti lomi caan le thil sining hna cu Bawipa kut ah kan chanh. Cu cangka cun Pathian thawnnak langhhram a van i thok ve.

Categories: Sermon

Leave a Reply