Tuan caan si

Hmunhnawm cawnpiak mi
Len kai thawh lio ah ka tupa Khenet Biak Za Thang cu innleng ah rua namte a sai/ a tuah. A saih khawh in a rua namte cun lente a rak i celh colh. A namte saihnak hnawmtaam vialte cu innleng ahcun a rak kaltak dih. Ka hong lawi tik i hnawm ka hmuh ka ah cun ka ing a puang. Van zai i van sik khi ka duh ngai.
Sinain, kan sining le dirhmun ka ruat pah. Cutin cun cu thil hmete nihcun biatak te khin khua a ka ruahter i cu khua ruah pah bu cun hmunphiah le hnawm ruhnak kai lak i ka ruh hna i hnawmbawm ah ka sanh hna.
Ka lungthin chuak, khuaruah mi hna cu :
1. Minung hi kan duhmi paoh kan hei tuah,  kan hei tuan cio ko i a tha in kan i ruah cio ko le kan vai lungsi ngai cio ko. Sinain, kan tuah tuan mi in midang ruh hau hmunhnawm ka kaltak sual maw ti i hnu hmai ai herh lo mi hi zeizat khidah kan hei si hnga le kan hei si rih hnga? 
A poimi cu kan duhmi kan tuah naknak khan, kan duhmi kan tuah ruang i midang fimtawl hau i hmunhnawm chiah ta hi a si. Nihin i kan ruh cawk lomi zong hi Ni Vun hmunhnawm a hei si ka ti.
Na tuahmi paoh cu a tha dih in na ruah ko lai. Sihmanhsehlaw, Bawipa nih nai tinhnak na lungthin kha a hngalh dih. Na tuahmi vialte cu Bawipa sinah pe law na khuakhannak cu a tling kho lai (Phungthluk.16:2-3).
2. Ka hmet lio i ka lente celh le ka pa hriamnak ka hman i ka rak rawk tawn kha ka mitthlam ah an cuang. Nihin, tu ka ngeih tiang ka pa nih a ka sikcak ka hngal bal rih lo. Ka nu le ka pa, ka pi le le ka pu nih khan zeitluk voitam kha dah sica lo tein ka hnawmtam hi an rak ka ruhpiak ve hnga? Keinih teh voi zetzat dah ka fale le ka tu le hmunhnawm hi ka ruhpiak ve cang hna hnga.
Ka fapa, nangmah nak in keimah hi rak thi ning law a tha deuh tiah amah a doh cuahmah mi a fapa hmanh a zaangfah i a ngaithiam khotu nu le pa dawtnak, a thilri vialte a hlohhlak hnu zong i a kir a hngak pengtu nu le pa dawtnak thuk hi zeitik tal ah cham khawh ni a hei um te hnga maw?  Nupi fate ngeih tiang nu le pa nih hnawmtam ruh piak hau peng hna ka si sual maw?
Bawipa hi zeitluk indah a that ti kha nanmah tein va kawl cio hmanh u, amah chungah him tein a ummi cu a lung ai lawm (Salm 34:8).Nan lak i sualnak a tuah bal lomi nih (mi sual nu cu) chep hmasa bik seh (John 8:7).
3. Hakkauh le  mithitnak lungthin he nu va zoh hmanh Pathian hmai ah sual a si va si kaw, nikhat te hmanh ahhin zeitluk tam khi dah Pathian nih sica lo tekhin ka sual hnawmtam hi a hei ka ruhpiak ve cang hnga mu ka ti. 
Pathian nih Vawlei hi a dawt hringhran caah a pafa ngeihchun te kha a pek. Cucaah amah a zummi paoh cu an thi lai lo, zungzal nunnak kha an ngei lai (John3:16).
Ka pa, ngaithiam hna (Luke 23:34). A inmi dantatnak in luatnak kan hmuh (Is.53:5).
Midang kha an sual va ngaithiam hna ulaw nannih zong Pathian nih nan sual an ngaihthiam ve hna lai. (Luke6:37).
Hi thil hna nihhin hmun nawmtu ka tupa cu sica lo tein, thadit bu zong ah a hmunhnawm cu a ka ruhter khawh.
Nihin cu sual i phawt caan si lo in tuanti caan tu a si deuh.

Categories: Uncategorized

Leave a Reply