Zumhnak Fiantertu

Pathian biak, Pathian zumh kan ti lengmang hi mit in kan hmuh khawh lomi a nungmi Pathian he pehtlaihnak neih khi a si tiin chim ah a fiangbik ko rua ka ti. Hrinthan le hrinthan lo, thlarau neih le neih lo timi biafang hna zong nih mit hmuh lo Pathian he pehtlaihnak kan neih le neih lo khi an sawh duhmi a si ko lo maw? Ahodah ding deuh, ahodah fel deuh, ahodah hrinthan deuh, ahodah thlarau nei deuh tibantuk pawl zong hi zumtu le zumtu ciocio kan i ti lengmang, cuai kan i tlai lengmang awk a si lo. Pathian he pehtlaihnak kan neih le neih lo a thei biktu cu kanmah le kanmah kan si i, biacaihnak nawl neitu cu Pathian lawnglawng a si. Zumtu tak kan si le silo cu Pathian he pehtlaihnak kan neih tak le neih tak lo nih a langhter. Zumtu tha, zumtu hman kan sile silo cu midang he pehtlaihnak kan neih le neih lo nih a langh ter. Cucu Khrih vailam a tung le a phei ai khangmi nih fiang hlang in a langhtermi a si.

Pehtlaihnak a nei lomi khrihfabu cu phone zong, internet zong, post office zong a um lonak khua bantuk a si. US khrihfabu a rak tumchuk nakbik zong hi zumtu le zumtu pehtlaihnak a rawh ruangah a si an ti. Pathian riantuantu hna le mipi an i hlat, upa le mino an i hlat. Member le member an i thei lo. US minung 100 ah 91 nih Pathian a um ti an zumh. Sawmriat le panga nih an nunnak ah zumhnak a biapi tiah an cohlan. Sawmruk le panga nih zumtu hawi he i komh an duh. Sinain biakinn panh cu an huam ti lo. Kum khat ah biakinn sawmli lengmang an khar. AD 2020 ahcun US minung 100 ah 15 lawnglawng hi biakinn an phan te lai tiah hlathlaitu nih an chim (Thom Schultz). US ram chung zumtu a si ko nain biakinn a phan ti lomi tampi kha bia an hal hna tikah a ruang an chimmi hna cu biakinn ah: 1) mi soisel hmangmi member an tam tuk, 2) mi phuhrun tertu le ningzah tertu cawnpiaktu saya/mah an tam tuk, 3) zapi i tel khawhnak program a tlawm tuk, 4) Pathian nih minung a kan dawtnak a leng lo, ti hna an si (Thom Schultz).

Pope Fransis nih, khrihfabu cu zumtu vialte caah hmun nuam Jerusalem a si awk a si, a ti. Khrihfa mifim Jurgen Moltmann nih, khrihfabu cu minung ahohmanh thlei dang loin i hawi komhnak a si a ti. Laimi kan khrihfabu hna hi: 1) mi sual mi palh caah hmun nuam a si awk a si, 2) sifak mi har caah hmun nuam a si awk a si, 3) mi hrinthan, mi ding mi fel pawl ca zongah hmun nuam a si awk a si, 4) mi rum mi nung kho ca zongah hmun nuam a si awk a si, 5) mifim mi sang hna ca zongah hmun nuam a si awk a si, 6) mi hrin than lo tiah kan ruahmi hna ca zongah hmun nuam a si awk a si, nuhmawi ngaktah le single pawl ca zongah hmun nuam a si awk a si. Bia dang in chim ahcun, khrihfabu cu isolhphelhnak hmun siloin idomhtlaihnak hmun a si. Isoiselnak hmun siloin idawtnak hmun a si. Pathian nih minung a kan pehtlaih khawhnak cu kan sining tein a kan cohlan caah a si. Zumtu le zumtu zong kanmah le kan sining cio tein kan i cohlan hmasabik a hau. Khrih nih innkhan tampi a kan serpiak cangah kan khrihfabu cio nih kutka tampi awng hna usih.

Categories: Theological paper

Leave a Reply