Zumhnak Tette (The Witness of Faith)

Zumhnak Tette

         Tlangval pakhat nih ai ngaihbikmi cu a nungaknu hamnak tette “zungbunh” pek khi a si. Cu zungbunh cu nu nih a cohlan a si ahcun thinlung tak tein nun kan i hrawm cang lai timi langhternak tette a si. An i um hnu ah a nupi cu ruah loin in a thi ding a hung si. Cu tikah nu nih an pa cu, hi zungbunh te hi tha tein rak ka kil kawi piak a ti. An pa nih an nu a ngaih caan paoh ah cu zung bunh cu a zoh i a hnamh than lengmang. Zumtu kan sinak ahhin ahodah a hrinthan, ahodah a hrin than lo, tiin kan i hnurta lengmang. Minung thinlung cu theih a har tuk caah kan lenglei kan i langhnak men in tah khawh a si lo. Kan chawva cung i kan lungput, kan phaisa kan kalternak nih Pathian kan zumh tak le zumh tak lo cu a langter. Cu caah hneksak a duh lomi Pathian nih, nan chawva lawnglawng in ka hneksak uh a ti. Bawipa caah kan sui kuthlawh kan pek sian le sian lo hi kan zumhnak tette a si. Kan chaw umnak ah kan thinlung cu a um taktak.

Hngakchia pa nih a neihmi lente celhnak pahnih kha keh he orh he ai tlaih i an ka chuh sual lai tiah a mit rangrang in hngakchia hawi kha a zoh hna. A duh lobik mi cu, pe ve hna, hlan ve hna, ti kha a si. Ai nuam lobik mi zong amah a si. Mi nih an zoh beh. A neih ciami kha ai hum tup. Thluachuah dang laknak dingah a kut nih a tlum ti lo. A nu le a pa nih, zeihmanh kan in cawkpiak ti lai lo, an ti. Hngakchia pa nih a zumh khawh lomi, a hngalh khawh tak lomi cu “peknak” ah thluachuah a um tihi a si. Peknak hi Pathian nih thluachuahnak caah a khenhchih cangmi lam a si. Nun va siang law na rum taktak ko lai. Khircar le hnem nih herhbaunak a chap chin taktak. Cucu pekmi le pek lomi a zat ah khan a si lo. Peksiannak le sianlonak lunthin ah khan a hram ai bumh. Peksiannak cu Bawipa sal kan sinak tette a si. Sianlonak cu phaisa sal kan sinak tette a si. Phaisa sal cu phaisa duhnak in kan i thok i phaisa duhnak in kan dong lai. Pathian sal cu Pathian duhning in sermi kan si i Pathian duhning in kan dong lai.

“Phaisa cu thla a nei” tiah an kan chimh tawn. Pathian bia ah a um taktak. Haggai chungah, nan nih nih thi loin nan tuan, kei nih a thli in ka rak zuamter hna, a ti. A ruang cu Bawipa inn nan rian lo, a ti. Cheuhracheukhat cu Bawipa ta a si. Amah a khrihfabu dirhnak le a riantuannak caah hman ding a si. Cupinah kan pawng i a ummi mi har bawmh ding ah kan thazang, kan lomhman thawh rih ding a si. Cheuhra cheukhat cu zapi sinah langhnganin pek ding a si. Mi bawmhnak cu ahohmanh theih loin pek ding/tuah ding a si. Hi thil vialte hi thilrit in kan ruah chung paoh cu a rawkmi bank, ai kharmi tiva bantuk kan si. Thluachuah i kan ruah khawh ahcun a cat lomi Vaar, Timit, Bawinu, Lahva, Tio tiva hna bantuk kan si. Kan chawva in Pathian kan zumhnak tette langhter hna usih.

Categories: Theological paper

Leave a Reply